ലക്‌നൗ: സ്‌കൂള്‍ ഫീസ് അടയ്ക്കാന്‍ സാധിക്കാത്തതിനെ തുടര്‍ന്ന് ഉത്തര്‍പ്രദേശില്‍ വിദ്യാര്‍ഥിനി ജീവനൊടുക്കി.
ദാരിദ്ര്യം കാരണം ഫീസടയ്ക്കാന്‍ സാധിക്കാത്തതാണ് കുട്ടിയെ ആത്മഹത്യയിലേക്കു നയിച്ചതെന്നു പൊലിസ് പറഞ്ഞു. കല്യാണ്‍പുരിയിലെ സ്വകാര്യ സ്‌കൂളില്‍ പ്ലസ് വണിനു പഠിക്കുന്ന യാസ്മിനാണ് ആത്മഹത്യ ചെയ്തത്. പതിനെട്ടു വയസായിരുന്നു. ട്രക്ക് ഡ്രൈവറായ യാക്കൂബാണ് പിതാവ്.
സ്‌കൂള്‍ ഫീസില്‍ ബാക്കിയുള്ള 1,500 രൂപ അടയ്ക്കാനാവശ്യപ്പെട്ടു സ്‌കൂളധികൃതര്‍ കുട്ടിയില്‍ സമ്മര്‍ദം ചെലുത്തിയിരുന്നെന്നും മറ്റു കുട്ടികള്‍ക്കു മുന്നില്‍ അപമാനിച്ചിരുന്നെന്നും പിതാവ് ആരോപിച്ചു. തുടര്‍ന്നു വേറെ വഴിയില്ലാതായപ്പോഴാണ് മകള്‍ ജീവനൊടുക്കിയതെന്നും അദ്ദേഹം പറഞ്ഞു. സംഭവത്തില്‍ കേസ് രജിസ്റ്റര്‍ ചെയ്തിട്ടില്ലെന്നു കല്യാണ്‍പുരി പൊലിസ് അറിയിച്ചു.