ആലുവ: ലക്ഷങ്ങള്‍ മുടക്കി നഗരമധ്യത്തില്‍ പണിതീര്‍ത്ത ആലുവയിലെ സ്മാര്‍ട്ട് ബസ് സ്റ്റോപ്പ് നോക്കുകുത്തിയാകുന്നു. ആലുവ ബാങ്ക് കവലയില്‍ വൈഫൈ, മ്യൂസിക്, റേഡിയോ അടക്കം സജ്ജീകരിച്ചിട്ടുള്ള സ്മാര്‍ട്ട് ബസ് സ്റ്റോപ്പാണ് പൊതുജനങ്ങള്‍ക്ക് ഉപകാരമില്ലാതാകുന്നത്. എറണാകുളം, പെരുമ്പാവൂര്‍ തുടങ്ങി കേരളത്തിന്റെ നാനാഭാഗത്തേക്കും ഏതുബസുകളും എത്തിച്ചേരുന്ന തിരക്കേറിയ ബാങ്ക് കവലയില്‍ ബസ്‌ബെ നിലവിലുണ്ടായിരുന്നില്ല. ഈ ഭാഗത്ത് ലക്ഷങ്ങള്‍ മുടക്കി ഫുട്പാത്ത് നവീകരിച്ചപ്പോഴും സാങ്കേതികത്വം നിരത്തി അധികൃതര്‍ ഇത് ഒഴിവാക്കുകയായിരുന്നു.
തുടര്‍ന്ന് തെരഞ്ഞെടുപ്പിന് മുന്‍പായി അന്‍വര്‍ സാദത്ത് എം.എല്‍.എ വികസന ഫണ്ടില്‍ നിന്നും അഞ്ച് ലക്ഷം രൂപ മുടക്കി അത്യാധുനിക രീതിയില്‍ നഗരമധ്യത്തില്‍ സ്മാര്‍ട്ട് ബസ് സ്റ്റോപ്പ് നിര്‍മ്മിക്കുകയായിരുന്നു. എന്നാല്‍ സ്മാര്‍ട്ട് ബസ് സ്റ്റോപ്പില്‍ ഒരു ബസുകളും നിര്‍ത്തുന്നില്ലെന്നാണ് പരാതി. നേരത്തേ ആളെകയറ്റിയിറക്കാന്‍ ബസുകള്‍ നിര്‍ത്തിയിരുന്ന സ്ഥലത്താണ് ഇപ്പോഴും ബസുകള്‍ നിര്‍ത്തുന്നത്.  അതിനാല്‍ ബസും കാത്ത് സ്മാര്‍ട്ട് ബസ് സ്റ്റോപ്പില്‍ നില്‍ക്കുന്നവര്‍ ബസുകളുടെ പിന്നാലെ ഓടേണ്ട ഗതികേടിലാണ്. ബസ്സ് സ്റ്റോപ്പ് ക്രമീകരണത്തിന് അധികൃതര്‍ യാതൊരു നടപടികളും സ്വീകരിക്കുന്നില്ലെന്ന് വ്യാപക പരാതിയുണ്ട്.