ബെംഗളൂരു: മയക്കുമരുന്ന് കേസില്‍ അറസ്റ്റിലായ ബിനീഷ് കോടിയേരിയുടെ ബിനാമിയാണ് നേരത്തെ പിടിയിലായ അനൂപ് മുഹമ്മദെന്ന് എന്‍ഫോഴ്‌സ്‌മെന്റ് ഡയരക്ടറേറ്റ് (ഇ.ഡി). അനൂപിനെ ബിനാമിയാക്കി ബിനീഷ് നിരവധി ബിസിനസുകള്‍ ബെംഗളൂരുവില്‍ ചെയ്തുവെന്നും ഇ.ഡി പറഞ്ഞു.

അനൂപും ബിനീഷും തമ്മില്‍ വളരെ അടുത്ത സുഹൃത്തുക്കളാണ്. അറസ്റ്റിന് തൊട്ടുമുന്‍പും അനൂപ് ബിനീഷിനെ ഫോണില്‍ വിളിച്ചുവെന്നും ബിനീഷ് സ്ഥിരമായി ബംഗളൂരു സന്ദര്‍ശിച്ചിരുന്നുവെന്നും ഇ.ഡി കണ്ടെത്തി. ബിനീഷ് കേരളത്തിലിരുന്ന് അനൂപിനെ നിയന്ത്രിച്ചുവെന്നും അനൂപിന്റെ ലഹരിമരുന്ന് ഇടപാടുകളെക്കുറിച്ച് അറിയില്ലെന്ന് ബിനീഷ് പറയുന്നത് വിശ്വാസയോഗ്യമല്ലെന്നും ഇ.ഡി പറഞ്ഞു.

അതേസമയം, ബിനീഷിനെ ഇന്ന് രാവിലെ ബെംഗളൂരുവിലെ ഇ.ഡി ആസ്ഥാനത്തേക്ക് കൊണ്ടുവന്നു. നാല് ദിവസത്തേക്കാണ് കസ്റ്റഡി കാലാവധി.