ലഖ്‌നൗ: ഉത്തര്‍പ്രദേശ് നിയമസഭയുടെ പ്രഥമ സമ്മേളനത്തില്‍ തന്നെ ഭരണപക്ഷത്തിനെതിരേ പ്രതിപക്ഷത്തിന്റെ കടുത്ത വിമര്‍ശനവും പ്രതിഷേധവും. സഭയില്‍ ഗവര്‍ണര്‍ രാം നായിക്കിന്റെ നയപ്രഖ്യാപന പ്രസംഗത്തിനെതിരേ ശക്തമായ പ്രതിഷേധം ഉയര്‍ത്തിയ പ്രതിപക്ഷം അദ്ദേഹത്തിനുനേരെ കടലാസുകള്‍ ചുരുട്ടി എറിയുകയും ചെയ്തു. 35 മിനുട്ട് നീണ്ടുനിന്ന നയപ്രഖ്യാപന പ്രസംഗം കേള്‍ക്കാന്‍ കഴിയുന്നില്ലെന്ന് ചൂണ്ടിക്കാട്ടി സമാജ് വാദി പാര്‍ട്ടി നേതാവ് രാജേഷ് യാദവ് ആണ് ആദ്യം പ്രതിഷേധം ഉയര്‍ത്തിയത്. തുടര്‍ന്ന് സര്‍ക്കാരിനെതിരേ രൂക്ഷമായ വിമര്‍ശനം ഉന്നയിച്ചുകൊണ്ടുള്ള പോസ്റ്ററുകളും പ്ലക്കാര്‍ഡുകളും ഉയര്‍ത്തിയ പ്രതിപക്ഷം ഗവര്‍ണറുടെ പ്രസംഗം പലതവണ തടസപ്പെടുത്തി.