വടകര : ആയിരം പുസ്തകങ്ങളേക്കാള്‍ ഏറെ അറിവുകള്‍ സംഭരിച്ചവരാണ് നമ്മുടെ മുത്തശ്ശിമാര്‍ എന്നും അവരില്‍ നിന്നും പ്രകൃതിയുടെ ബാലപാഠങ്ങള്‍ കുട്ടികള്‍ മനസിലാക്കണമെന്നും പ്രമുഖ കഥാകൃത്ത് എം. മുകുന്ദന്‍.
അഴിയൂര്‍ ഗ്രാമപഞ്ചായത്തിന്റെ നൂതന പദ്ധതിയായ മുത്തശ്ശിയോട് ചോദിക്കാം പരിപാടി കല്ലാമല യു.പി സ്‌കൂളില്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സി.സി.ഡി.യു തയ്യാറാക്കിയ 54 ചോദ്യങ്ങള്‍ കല്ലാമലയിലെ ലക്ഷ്മി മുത്തശ്ശിക്ക് നല്‍കി എം.മുകുന്ദന്‍ ഉദ്ഘാടനം ചെയ്തു.
പ്രകൃതിയെയും പരിസ്ഥിതി ശുചിത്വത്തിന്റെയും സാമൂഹ്യബോധം സൃഷ്ടിക്കുക എന്നതായിരുന്നു പദ്ധതിയുടെ ലക്ഷ്യം.
പഞ്ചായത്ത് പ്രസിഡന്റ് ഇ.ടി അയ്യൂബ് അധ്യക്ഷനായി. വള്ളത്തോള്‍ പുരസ്‌കാരം നേടിയ എം. മുകുന്ദന് പഞ്ചായത്തിന്റെ ഉപഹാരം ചടങ്ങില്‍ വച്ച് പ്രസിഡന്റ് നല്‍കി. പഞ്ചായത്ത് സെക്രട്ടറി ടി. ഷാഹുല്‍ ഹമീദ്, വൈസ് പ്രസിഡന്റ് റീന രയോരോത്ത്, ജാസ്മിന കല്ലേരി, പങ്കജാക്ഷി ടീച്ചര്‍, പി.പി ശ്രീധരന്‍, ശുഭ മുരളീധരന്‍, വീരോളി അബ്ദുറഹിമാന്‍ (എന്‍ജിനീയര്‍), ചോമ്പാല്‍ എ.ഇ.ഒ കെ. സുരേന്ദന്‍, എന്‍.വി റഹ്മാന്‍, സുരേഷ്ബാബു, ഇ.എം.ഷാജി, അബ്ദുള്‍ സലാം , ചാലക്കര പുരുഷു, രജിത്ത്, വിജിത സംസാരിച്ചു.