ചേരമ്പാടി: വന്യജീവി ആക്രമണത്തിനെതിരേ നടപടി സ്വീകരിക്കാത്ത തമിഴ്‌നാട് സര്‍ക്കാര്‍ നടപടിയില്‍ പ്രതിഷേധിച്ച് സി.പി.എമ്മിന്റെ നേതൃത്വത്തില്‍ ചേരമ്പാടിയില്‍ ധര്‍ണ നടത്തി.
കാട്ടാനഅക്രമത്തില്‍ കൊല്ലപ്പെടുന്നവരുടെ കുടുംബത്തിന് 25 ലക്ഷം രൂപ നഷ്ട പരിഹാരം നല്‍കുക, കുടുംബത്തിലെ ഒരാള്‍ക്ക് സര്‍ക്കാര്‍ ജോലി നല്‍കുക, സോളാര്‍, റെയില്‍ പാളഫെന്‍സിങ് സ്ഥാപിക്കുക, വനാതിര്‍ത്തികളില്‍ കിടങ്ങ് നിര്‍മിക്കുക, വന്യജീവി ശല്യം തടയാന്‍ ശാസ്ത്രീയമായ പഠനം നടത്തുക, വന്യജീവി ആക്രമണത്തില്‍ പരുക്കേല്‍ക്കുന്നവര്‍ക്ക് 10 ലക്ഷം രൂപ നഷ്ട പരിഹാരം നല്‍കുക തുടങ്ങിയ ആവശ്യങ്ങള്‍ ഉന്നയിച്ചാണ് സമരം നടത്തിയത്.
സി.പി.എം ജില്ലാ സെക്രട്ടറി വി.എ ഭാസ്‌കരന്‍ ധര്‍ണ ഉദ്ഘാടനം ചെയ്തു. കെ. രാജ്കുമാര്‍ അധ്യക്ഷനായി. കെ. രാജന്‍, എ. യോഹന്നാന്‍, ഹമീദ് മാസ്റ്റര്‍, മണികണ്ഠന്‍, ടി.കെ ഫിലിപ്പ് സംസാരിച്ചു.
വന്യമൃഗ ശല്യം പരിഹരിക്കുന്നതുമായി ബന്ധപ്പെട്ട് 21ന് ചേരമ്പാടിയില്‍ ഉന്നത ഉദ്യോഗസ്ഥരുടെ നേതൃത്വത്തില്‍ പ്രത്യേക ചര്‍ച്ച നടത്താമെന്ന് അധികാരികള്‍ ഉറപ്പ് നല്‍കിയിട്ടുണ്ടെന്ന് നേതാക്കള്‍ അറിയിച്ചു. ചര്‍ച്ചയില്‍ ആര്‍.ഡി.ഒ, ഡി.എഫ്.ഒ, ഡിവൈ.എസ്.പി, തഹസില്‍ദാര്‍ ഉള്‍പ്പെടെയുള്ള ഉദ്യോഗസ്ഥര്‍ പങ്കെടുക്കും.