ടോക്യോ: സമഗ്ര സാമ്പത്തിക പങ്കാളിത്ത കരാറില്‍ (ആര്‍.സി.ഇ.പി) അംഗങ്ങളായ 15 രാജ്യങ്ങള്‍ സ്വതന്ത്ര വ്യാപാര കരാറില്‍ ഞായറാഴ്ച ഒപ്പുവയ്ക്കും. ചൈനയുടെ നേതൃത്വത്തിലുള്ള ആര്‍.സി.ഇ.പിയില്‍ ഇന്ത്യ അംഗമായിട്ടില്ല. അംഗമാവുന്നതിനെതിരേ രാജ്യത്ത് വന്‍ പ്രതിഷേധമുയര്‍ന്നിരുന്നു.
ആസിയാനില്‍ അംഗങ്ങളായ ബ്രൂണെ, മ്യാന്‍മര്‍, കംബോഡിയ, ഇന്തോനേഷ്യ, ലാവോസ്, മലേഷ്യ, ഫിലിപ്പൈന്‍സ്, സിംഗപ്പൂര്‍, തായ്‌ലന്‍ഡ്, വിയറ്റ്‌നാം എന്നീ രാജ്യങ്ങളും അവരുടെ സ്വതന്ത്ര വ്യാപാര പങ്കാളികളായ ഇന്ത്യ, ഓസ്‌ട്രേലിയ, ചൈന, ജപ്പാന്‍, ന്യൂസിലന്‍ഡ്, ദക്ഷിണ കൊറിയ എന്നിവയെയും ഒറ്റ കുടക്കീഴില്‍ കൊണ്ടുവന്നു വലിയ സ്വതന്ത്ര വ്യാപാരമേഖല രൂപീകരിക്കുകയാണ് ആര്‍.സി.ഇ.പിയുടെ ലക്ഷ്യം. 2013ല്‍ ആര്‍.സി.ഇ.പി ചര്‍ച്ചകളില്‍ പങ്കെടുത്തിരുന്ന ഇന്ത്യ കഴിഞ്ഞവര്‍ഷമാണ് ഇതില്‍ നിന്ന് പിന്മാറിയത്.
അതേസമയം കരാറില്‍ അംഗമാവുന്നത് ഇന്ത്യയില്‍നിന്നുള്ള പ്രൊഫഷണലുകള്‍ക്ക് ചില രാജ്യങ്ങളിലെ സേവനമേഖലകളിലേക്കുള്ള വാതില്‍ തുറന്നുനല്‍കുമെങ്കിലും കാര്‍ഷികമേഖലയെ ആശ്രയിച്ചുനില്‍ക്കുന്ന സംസ്ഥാനങ്ങളെ സാരമായി ബാധിക്കുമെന്ന് വിദഗ്ധര്‍ പറയുന്നു.