ന്യൂഡല്‍ഹി: ഭൂട്ടാന്‍ മേഖലയില്‍ അതിര്‍ത്തിയില്‍നിന്ന് രണ്ടു കിലോമീറ്റര്‍ പുതിയ ഗ്രാമം നിര്‍മിച്ച് ചൈന. 2017ല്‍ ഇന്ത്യന്‍- ചൈനീസ് സംഘര്‍ഷമുണ്ടായ ഡോക്‌ലാമിന് 9 കിലോമീറ്റര്‍ മാത്രം അകലെയാണ് ചൈന പുതിയ ഗ്രാമം നിര്‍മിച്ചിരിക്കുന്നത്.

ചൈനയിലെ സി.ജി.ടി.എന്‍ ന്യൂസിലെ മുതിര്‍ന്ന മാധ്യമപ്രവര്‍ത്തകന്‍ ട്വീറ്റ് ചെയ്ത ചിത്രങ്ങളിലൂടെയാണ് ഇക്കാര്യം പുറത്തുവന്നത്. എന്നാല്‍ ട്വീറ്റ് പിന്നീട് പിന്‍വലിച്ചു.
ഭൂട്ടാന്‍ അതിര്‍ത്തിയില്‍ നിന്ന് രണ്ടു കിലോമീറ്റര്‍ മാറിയാണ് പാങ്ദാ ഗ്രാമം. ഇന്ത്യാ ഭൂട്ടാന്‍ അതിര്‍ത്തി ക്രമേണ കവര്‍ന്നെടക്കാനുള്ള ചൈനയുടെ ശ്രമമാണിതെന്നാണ് ഇന്ത്യയുടെ ഭീതി.

ഇത്തരമൊരു നിര്‍മിതിക്ക് ഭൂട്ടാന്‍ ചൈനയ്ക്ക് നല്‍കിയിരുന്നോ എന്നതും വ്യക്തമല്ല. ചൈനയുടെ കടന്നുകയറ്റം വളരെ പരിമിതമായ സൈനിക ശേഷി മാത്രമുള്ള ഭൂട്ടാന്റെ പ്രാദേശിക ഐക്യത്തെ ഇല്ലാതാക്കുമെന്നും ഇന്ത്യ ആശങ്കപ്പെടുന്നു.

ഇന്ത്യയും ചൈനയും തമ്മില്‍ നൂറ്റാണ്ടുകള്‍ക്കിടയില്‍ ഉണ്ടായ ഏറ്റവും വലിയ സംഘര്‍ഷങ്ങളില്‍ ഒന്നാണ് ഡോക്‌ലാമില്‍ അരങ്ങേറിയിരുന്നത്. ഇത് രണ്ടര മാസത്തോളം നീണ്ടുനിന്നു. ഇക്കഴിഞ്ഞ ജൂണില്‍ കിഴക്കന്‍ ലഡാക്കിലെ സംഘര്‍ഷത്തില്‍ 20 ഇന്ത്യ സൈനികര്‍ വീരമൃത്യുവരിച്ചിരുന്നു. തുടര്‍ന്ന് ഇരുരാജ്യങ്ങളും തമ്മില്‍ നിരവധി തവണ ചര്‍ച്ചകള്‍ നടത്തിയെങ്കിലും പ്രശ്‌നത്തിന് പരിഹാരമായില്ല.