ന്യൂഡല്‍ഹി: മുംബൈയെയും അഹമ്മദാബാദിനെയും തമ്മില്‍ ബന്ധിപ്പിക്കുന്ന ഹൈസ്പീഡ് റെയില്‍ പദ്ധതിക്കായി 24 ട്രെയിനുകള്‍ ജപ്പാനില്‍നിന്ന് വാങ്ങും. ഇവയില്‍ ആറെണ്ണം മേക്ക് ഇന്‍ ഇന്ത്യ പദ്ധതിയുടെ ഭാഗമായി ഇന്ത്യയില്‍ അസംബിള്‍ ചെയ്യും. രാജ്യസഭയെ റെയില്‍വേമന്ത്രി പിയുഷ് ഗോയല്‍ അറിയിച്ചതാണിക്കാര്യം. 1,08,000 കോടി രൂപയാണ് പദ്ധതിക്ക് ചെലവ് പ്രതീക്ഷിക്കുന്നത്. ഇതിന്റെ 81 ശതമാനവും ജപ്പാന്‍ ഇന്റര്‍നാഷനല്‍ കോ ഓപറേഷന്‍ ഏജന്‍സി (ജെയ്ക്ക) വായ്പയായി നല്‍കും. 2023ല്‍ പദ്ധതി യാഥാര്‍ഥ്യമാകുമെന്നാണ് കരുതുന്നത്. രാജ്യത്തെ പ്രീമിയം ട്രെയിനുകളായ രാജധാനി എക്‌സ്പ്രസ്, ശതാബ്ദി എക്‌സ്പ്രസ്, ഡുറന്‍ഡോ എക്‌സ്പ്രസ് എന്നിവ സ്വകാര്യവല്‍കരിക്കാന്‍ സര്‍ക്കാരിന് നീക്കമില്ലെന്നും റെയില്‍വേ മന്ത്രി അറിയിച്ചു.