കൊച്ചി: ഡബ്ല്യു.സി.സിയുടെ കടുത്ത എതിര്‍പ്പിനെ തുടര്‍ന്ന് താരസംഘടനയായ അമ്മയുടെ ഭരണഘടന ഭേദഗതി ചെയ്യുന്ന നടപടി മരവിപ്പിച്ചു.
കരട് ഭേദഗതി കൊണ്ടുവന്ന 'അമ്മ' എക്‌സിക്യൂട്ടീവ് കമ്മിറ്റിക്കെതിരേ വിമണ്‍ ഇന്‍ സിനിമാ കലക്ടീവ് അംഗങ്ങള്‍ രംഗത്തെത്തിയയോടെയാണ് ഭേദഗതി നടപടി മരവിപ്പിക്കാന്‍ യോഗം തീരുമാനിച്ചത്.

എക്‌സിക്യൂട്ടീവിന്റെ തീരുമാനം ചോദ്യം ചെയ്തവരെയൊക്കെ പുറത്താക്കുകയാണെന്നും കരട് ഭേദഗതി ജനാധിപത്യ വിരുദ്ധവും യുക്തിരഹിതവുമാണെന്നും ഡബ്ല്യു.സി.സി ആരോപിച്ചതായും വിവരമുണ്ട്. എതിര്‍പ്പുകള്‍ ഡബ്ല്യു.സി.സി യോഗത്തില്‍ രേഖാമൂലം നല്‍കി.

അതേസമയം, കരട് ഭേദഗതിയില്‍ ചര്‍ച്ച ആവശ്യമുണ്ടെന്ന് കണ്ടതിനാലാണ് തല്‍ക്കാലം ഭേദഗതി മരവിപ്പിക്കുന്നതെന്ന് 'അമ്മ' പ്രസിഡന്റ് മോഹന്‍ലാല്‍ പിന്നീട് വാര്‍ത്താസമ്മേളനത്തില്‍ വ്യക്തമാക്കി. ഭരണഘടനാ ഭേദഗതികളെക്കുറിച്ച് വിശദമായ ചര്‍ച്ച നടത്തി. ചര്‍ച്ചകള്‍ ഇന്ന് അവസാനിക്കാതിരുന്നതിനാലാണ് തല്‍ക്കാലം ജനറല്‍ ബോഡി അവസാനിപ്പിച്ചത്.

രാജിവച്ച അംഗങ്ങള്‍ക്ക് 'അമ്മ'യ്ക്ക് അപേക്ഷ എഴുതിത്തന്നാല്‍ മാത്രം തിരിച്ചുവരാം. അപേക്ഷ നല്‍കിയാല്‍ അംഗങ്ങള്‍ക്ക് അംഗത്വ ഫീസില്ലാതെത്തന്നെ തിരികെ വരാന്‍ കഴിയണമെന്ന് മമ്മൂട്ടി യോഗത്തില്‍ ആവശ്യപ്പെട്ടു. ഇത് അംഗങ്ങള്‍ കൈയടിച്ച് അംഗീകരിക്കുകയും ചെയ്തു.
ഇതില്‍ അന്തിമ തീരുമാനം ഇനി എക്‌സിക്യൂട്ടീവാകും കൈക്കൊള്ളുക. യോഗത്തില്‍ 'അമ്മ'യുടെ വക്താവായി മോഹന്‍ലാലിനെ തിരഞ്ഞെടുത്തിട്ടുണ്ട്. ഇനി മാധ്യമങ്ങളോട് 'അമ്മ'യ്ക്കുവേണ്ടി സംസാരിക്കുക മോഹന്‍ലാലായിരിക്കുമെന്നും എക്‌സിക്യൂട്ടീവ് കമ്മിറ്റി വാര്‍ത്താസമ്മേളനത്തില്‍ വ്യക്തമാക്കി.