ദുബൈ: കേരളത്തില്‍ കഴിഞ്ഞ രണ്ട് മൂന്ന് ആഴ്ചയായി സ്വര്‍ണവില കുറഞ്ഞുവരികയാണ്. സമാന പ്രതിഭാസമാണ് രാജ്യാന്തരതലത്തിലും കാണാന്‍ കഴിയുന്നത്. കേരളത്തില്‍ മൂന്നാഴ്ചയ്ക്കുള്ളില്‍ 3,500 ഓളം രൂപയാണ് ഒരു പവന്‍ സ്വര്‍ണത്തിന് കുറഞ്ഞത്. അതായത്, ഗ്രാമിന് 450 രൂപയോളം കുറവുണ്ടായി. കുതിച്ചുകൊണ്ടിരുന്ന സ്വര്‍ണവിലയെ ഇന്ത്യയില്‍ പിടിച്ചുനിര്‍ത്തിയത് കഴിഞ്ഞ ബജറ്റില്‍ സ്വര്‍ണത്തിനുള്ള എക്‌സൈസ് തീരുവ കുറച്ചതാണ്. 

എന്നാല്‍ രാജ്യാന്തര വിപണിയിലെ ചലനങ്ങള്‍ ഇവിടെ സ്വര്‍ണത്തിന് വിലകൂട്ടിയെങ്കിലും യു.എസ് പ്രസിഡന്റ് തെരഞ്ഞെടുപ്പില്‍ ഡൊണാള്‍ഡ് ട്രംപ് വിജയിച്ചതോടെ സ്വര്‍ണവിലയെ ബാധിച്ചു. വില കുത്തനെ ഇടിഞ്ഞുകൊണ്ടിരുന്നു. ഒപ്പം പശ്ചിമേഷ്യയിലെ സംഘര്‍ഷാവസ്ഥയും സ്വര്‍ണവിപണിയെ ബാധിക്കുന്നുണ്ട്.

കേരളത്തിലെ നവംബറിലെ സ്വര്‍ണവില

പശ്ചിമേഷ്യയിലെ സാഹചര്യങ്ങള്‍ ഗള്‍ഫ് രാഷ്ട്രങ്ങളിലെ സ്വര്‍ണവിപണിയെയും ബാധിച്ചതോടെ, ഇന്ത്യയിലെതിനേക്കാള്‍ സ്വര്‍ണവില ചിലയിടങ്ങളില്‍ രേഖപ്പെടുത്തി. ലോകത്തെ പരമ്പരാഗത സ്വര്‍ണ വിപണികളായ ഒമാന്‍, സിംഗപ്പൂര്‍, UAE, ഖത്തര്‍ എന്നിവിടങ്ങളിലെ വിലയേക്കാള്‍ കുറവാണ് ഇന്ത്യയിലെ സ്വര്‍ണവിലയെന്ന് ബിസിനസ് ഇന്‍സൈഡറിന്റെ റിപ്പോര്‍ട്ട് ചെയ്തു. ഇന്നലെ ഇന്ത്യയില്‍ 24 കാരറ്റ് സ്വര്‍ണത്തിന് പത്ത് ഗ്രാമിന് 110 രൂപ കുറഞ്ഞ് 75,650 രൂപയിലെത്തിയതോടെയാണ് ഈ മാറ്റമുണ്ടായത്.

ഇന്ത്യയില്‍ 22 കാരറ്റ് സ്വര്‍ണം പത്ത് ഗ്രാമിന്റെ വില 69,350 രൂപയായും 18 കാരറ്റിന് 56,740 രൂപയിലേക്കുമാണ് കുറഞ്ഞത്. എന്നാല്‍ യു.എ.ഇയില്‍ 24 കാരറ്റ് സ്വര്‍ണത്തിന്റെ വില പത്ത് ഗ്രാമിന് 3,107.5 ദിര്‍ഹം ആയാണ് ഉയര്‍ന്നത്. ഇത് ഇന്ത്യന്‍ രൂപയിലേക്ക് മാറുമ്പോള്‍ വിനിമയ നിരക്ക് 76,220 ആണ്. 22 കാരറ്റ് സ്വര്‍ണത്തിന്റെ വില പത്ത് ഗ്രാമിന് 2,877.5 UAE ദിര്‍ഹം അതായത് 70,460 രൂപ. 

 

 

ഒമാനില്‍ 24 കാരറ്റ് സ്വര്‍ണത്തിന്റെ വില ഇന്നലെ പത്ത് ഗ്രാമിന് 75,763 രൂപയിലാണ് വിപണി അവസാനിച്ചത്. ഖത്തറില്‍ 24 കാരറ്റിന് സ്വര്‍ണ വില പത്ത് ഗ്രാമിന് 76,293 രൂപയുമാണ്. ഒരു മാസമായി രൂപയുടെ മൂല്യം കുത്തനെ കുറഞ്ഞതും ഗള്‍ഫിലേക്കാള്‍ ഇന്ത്യയിലെ സ്വര്‍ണ വില കുറയാന്‍ കാരണമായി. 

ആഗോളതലത്തില്‍ മൂന്ന് വര്‍ഷത്തിനിടയിലെ ഏറ്റവും വലിയ ഇടിവാണ് സ്വര്‍ണ്ണ വിലയില്‍ ഈവാരം ഉണ്ടായിരിക്കുന്നത്. യു.എസില്‍ സ്‌പോട്ട് വിലകള്‍ 4.5% ഇടിഞ്ഞു. രണ്ട് മാസത്തെ ഏറ്റവും താഴ്ന്ന നിരക്കായ ട്രോയ് ഔണ്‍സിന് ഏകദേശം 2,563.25 ഡോളര്‍ എന്ന നിരക്കിലാണ് വ്യാപാരം നടക്കുന്നത്.

രാജ്യങ്ങളിലെ ഇന്നലത്തെ വില

സ്വര്‍ണത്തിന്റെ തീരുവ ആറ് ശതമാനമാക്കിയതാണ് രാജ്യാന്തര വിപണി വിലയുമായുള്ള ഇന്ത്യന്‍ വിപണിയിലെ വിലവ്യത്യാസ കുറച്ചത്. ഇത് ഇന്ത്യയിലേക്കുള്ള സ്വര്‍ണ കള്ളക്കടത്ത് കുറയാനും കാരണമായി. സ്വര്‍ണക്കടത്ത് കുറയ്ക്കാന്‍ ഏറ്റവും നല്ല മാര്‍ഗം തീരുവ കുറയ്ക്കുകയാണെന്ന സ്വര്‍ണവ്യാപാരികളുടെ ആവശ്യം പരിഗണിച്ചായിരുന്നു കഴിഞ്ഞ പൊതുബജറ്റില്‍ തീരുവ കുറച്ചത്. 15 ശതമാനം തീരുവ ആറായി കുറച്ചു, കുറഞ്ഞത് ഒമ്പത് ശതമാനം. 

Here’s why gold is priced cheaper in India compared to Oman, UAE, Qatar