തൊടുപുഴ: കാഞ്ഞാര്‍ പുള്ളിക്കാനം റോഡില്‍ വാഹന പരിശോധനയ്ക്കിടയില്‍ എം.ഡി.എം.എയുമായി നടനും സുഹൃത്തും പിടിയില്‍. ചലച്ചിത്ര നടന്‍ എറണാകുളം കുന്നത്തുനാട് വെങ്ങോല കണ്ണങ്കര പള്ളിക്കൂടത്തുങ്കല്‍ വീട്ടില്‍ പരീക്കുട്ടി എന്ന ഫരീദുദീന്‍ പി.എസ് (31), കോഴിക്കോട് വടകര കാവിലുംപാറ പെരുമാലില്‍ ജിസ്മോന്‍ (24) എന്നിവരാണ് പിടിയിലായത്. ഹാപ്പി വെഡ്ഡിങ്, അഡാര്‍ ലൗ അടക്കമുള്ള ചിത്രങ്ങളില്‍ പരീക്കുട്ടി അഭിനയിച്ചിട്ടുണ്ട്.

മൂലമറ്റം എക്സൈസ് റേഞ്ച് ഇന്‍സ്പെക്ടര്‍ അഭിലാഷും സംഘവുമാണ് ഇവരില്‍ നിന്ന് 10.5 ഗ്രാം എം.ഡി.എം.എയും ഒമ്പത് ഗ്രാം കഞ്ചാവും പിടിച്ചെടുത്തത്. വാഗമണ്‍ റൂട്ടില്‍ വാഹനപരിശോധനയ്ക്കിടെ ഇവര്‍ സഞ്ചരിച്ച കര്‍ണാടക റജിസട്രേഷന്‍ കാറില്‍ നിന്നാണ് ലഹരി പിടിച്ചെടുത്തത്. പ്രതികളെ ഇന്ന് കോടതിയില്‍ ഹാജരാക്കും.