കരുവാരക്കുണ്ട്: ജീവിതത്തില്‍ വീടെന്ന സ്വപ്നം യാഥാര്‍ഥ്യമാകാന്‍ കഴിയാത്ത നിര്‍ധന കുടുംബങ്ങള്‍ക്ക് തല ചായ്ക്കാന്‍ ഒരു ഇടം ഒരുക്കി മാതൃകയാവുകയാണ് പ്രവാസി. തരിശിലെ പ്രവാസി ബിസിനസുകാരനാണ് ഒരു വര്‍ഷത്തിനിടെ നാലാമത്തെ വീട് നിര്‍മിച്ച് നിര്‍ധന കുടുംബത്തിന് നല്‍കുന്നത്. അദ്ദേഹത്തിന്റെ സുഹൃത്തും ജീവകാരുണ്യ പ്രവര്‍ത്തകനുമായ പി.കെ കരീമിന്റെ നേതൃത്വത്തിലാണ് വീട് നിര്‍മാണം നടക്കുന്നത്. മരുതിങ്ങലിലെ കണ്ടംകുളത്തി സീനത്തിനാണ് വീട് നിര്‍മിച്ചു നല്‍കിയത്.
അഞ്ച് സെന്റ് ഭൂമിയിലാണ് വീട് നിര്‍മിച്ചിട്ടുള്ളത്. വൈദ്യുതി കണക്ഷനും കുടിവെള്ള സൗകര്യവുമുണ്ട്. അഞ്ചുലക്ഷം രൂപ ചെലവിലാണ് വീട് നിര്‍മാണം. ഗ്രാമ പഞ്ചായത്തിലെ നിര്‍ധന കുടുംബങ്ങള്‍ക്ക് വീടെന്ന സ്വപ്നം ഒരുക്കുകയെന്നതാണ് പ്രവാസിയുടെ ലക്ഷ്യം. വീടിന്റെ ഗൃഹപ്രവേശനം തിങ്കളാഴ്ച്ച നടക്കും. ഗ്രാമ പഞ്ചായത്ത് പ്രസിഡന്റ് കെ മുഹമ്മദ് വീടിന്റെ താക്കോല്‍ സൈനബക്ക് കൈമാറും.