ബംഗളൂരു: ഉത്തരേന്ത്യന്‍ മാതൃകയില്‍ ഗോവധ നിരോധന നിയമം കൊണ്ടുവരാനൊരുങ്ങി കര്‍ണാടകയും. അടുത്ത മാസം ഏഴിനു തുടങ്ങുന്ന നിയമസഭാ സമ്മേളനത്തില്‍ നിയമം അവതരിപ്പിക്കുമെന്ന് മൃഗക്ഷേമ വകുപ്പ് മന്ത്രി പ്രഭു ചൗഹാന്‍ അറിയിച്ചു.
2010ല്‍ ബി.എസ് യെദ്യൂരപ്പയുടെ നേതൃത്വത്തിലുള്ള ബി.ജെ.പി സര്‍ക്കാര്‍ സംസ്ഥാനത്ത് ഗോവധനിരോധനിയമം കൊണ്ടുവന്നെങ്കിലും വിവാദ വ്യവസ്ഥകള്‍ കാരണം ഗവര്‍ണര്‍ ഒപ്പുവച്ചിരുന്നില്ല. തുടര്‍ന്ന് 2013ല്‍ അധികാരത്തില്‍ വന്ന സിദ്ധരാമയ്യ സര്‍ക്കാര്‍ ബില്‍ ഒഴിവാക്കുകയും ചെയ്തു. സമ്പൂര്‍ണ നിരോധനം സാധ്യമാവില്ലെന്നു ചൂണ്ടിക്കാട്ടിയായിരുന്നു ഇത്. ഗോവധ നിരോധനം കര്‍ണാടകയില്‍ ഉടന്‍ പ്രാബല്യത്തില്‍ വരുമെന്ന് അടുത്തിടെ ബി.ജെ.പി ദേശീയ ജനറല്‍ സെക്രട്ടറി സി.ടി രവി പറഞ്ഞിരുന്നു.കന്നുകാലികളെ അറുക്കുന്നതും ബീഫ് ഉപയോഗിക്കുന്നതും മറ്റു സംസ്ഥാനങ്ങളിലേക്കു വില്‍ക്കുന്നതുമെല്ലാം നിരോധന പരിധിയില്‍ ഉള്‍പ്പെടുമെന്നതിനാല്‍ നിയമം കേരളത്തെയും ബാധിക്കും.