തിരുവനന്തപുരം: വിഴിഞ്ഞം പദ്ധതിയുമായി ബന്ധപ്പെട്ട് സര്‍ക്കാര്‍ ധവളപത്രം ഇറക്കണമെന്ന് വി.എസ് അച്യുതാനന്ദന്‍ നിയമസഭയില്‍ സബ്മിഷനിലൂടെ ആവശ്യപ്പെട്ടു.
വിഴിഞ്ഞം പദ്ധതിക്കായി ഉമ്മന്‍ചാണ്ടി സര്‍ക്കാര്‍ കൊണ്ടുവന്ന കരാര്‍ അതേപടി പിന്‍തുടരുകയാണ് എല്‍.ഡി.എഫ് സര്‍ക്കാര്‍ ചെയ്യുന്നതെന്നു അദ്ദേഹം പറഞ്ഞു. എന്നാല്‍, ധവളപത്രം ഇറക്കുന്നതു സംബന്ധിച്ച് ആലോചിച്ച് തീരുമാനിക്കേണ്ടതാണെന്ന ഒഴുക്കന്‍ മറുപടിയാണ് വകുപ്പുമന്ത്രിയായ കടന്നപ്പള്ളി രാമചന്ദ്രന്‍ നല്‍കിയത്. പദ്ധതിയെ കഴിഞ്ഞ യു.ഡി.എഫ് സര്‍ക്കാര്‍ പി.പി.പി. മാതൃകയിലാക്കിയാണ് ഗൗതം അദാനിയുമായി കരാറില്‍ ഏര്‍പ്പെട്ടത്. 7525 കോടിയുടെ പദ്ധതിക്ക് 68 ശതമാനം തുക (5,071 കോടി) മുടക്കുന്നത് സംസ്ഥാന സര്‍ക്കാരാണ്.
32 ശതമാനം (2,454 കോടി) മാത്രമാണ് അദാനി ഗ്രൂപ്പ് മുടക്കുന്നത്. പോര്‍ട്ട് പണിപൂര്‍ത്തിയായതിനു ശേഷമുള്ള വരുമാനത്തിന്റെയും ലാഭത്തിന്റെയും ഭൂരിഭാഗവും കുറച്ചു മുതല്‍മുടക്കുന്ന അദാനി കൈയടക്കുന്ന സ്ഥിതിയാണുള്ളത്. ഈ സാഹചര്യത്തിലാണ് പദ്ധതിയുമായി ബന്ധപ്പെട്ട എല്ലാ വിവരങ്ങളും ജനങ്ങളെ അറിയിക്കാന്‍ ധവളപത്രം ഇറക്കണമെന്ന് വി.എസ് ആവശ്യപ്പെട്ടത്.