ന്യൂഡല്‍ഹി: കേന്ദ്രധനകാര്യമന്ത്രി അരുണ്‍ ജെയ്റ്റ്‌ലി നല്‍കിയ പുതിയ മാനനഷ്ടക്കേസില്‍ ഡല്‍ഹി മുഖ്യമന്ത്രിയും എ.എ.പി നേതാവുമായ അരവിന്ദ് കെജ്‌രിവാളിനോട് ഹൈക്കോടതി വിശദീകരണം തേടി. ഇതു സംബന്ധിച്ച് ജോയിന്റ് രജിസ്ട്രാര്‍ പങ്കജ് ഗുപ്ത കെജ്്‌രിവാളിന് നോട്ടിസ് അയച്ചു.
അടുത്തമാസം 26ന് കേസ് പരിഗണിക്കും. അതിന് മുന്‍പ് മറുപടി നല്‍കാനാണ് നോട്ടിസിലെ ആവശ്യം. കെജ്‌രിവാളടക്കമുള്ള എ.എ.പി നേതാക്കള്‍ക്കെതിരേ ജെയ്റ്റ്‌ലി മുന്‍പ് നല്‍കിയ മാനനഷ്ടക്കേസില്‍ വാദം നടക്കവെ കെജ്‌രിവാളിനു വേണ്ടി ഹാജരായ മുതിര്‍ന്ന അഭിഭാഷകന്‍ രാംജത്മലാനി നടത്തിയ പരാമര്‍ശത്തിനെതിരേ 10 കോടി നഷ്ടപരിഹാരം ആവശ്യപ്പെട്ട് തിങ്കളാഴ്ചയാണ് ജെയ്റ്റ്‌ലി കേസ് ഫയല്‍ ചെയ്തിരിക്കുന്നത്.
മെയ് 15, 17 ദിവസങ്ങളില്‍ ഡല്‍ഹി ഹൈക്കോടതിയില്‍ വാദം നടക്കുന്നതിനിടെ ജെയ്റ്റ്‌ലിയെ വഞ്ചകന്‍ എന്ന് ജത്മലാനി വിശേഷിപ്പിച്ചതിനാണ് കേസ്. ആദ്യകേസിലും 10 കോടി രൂപയാണ് ജെയ്റ്റ്‌ലി നഷ്ടപരിഹാരം ആവശ്യപ്പെട്ടിരുന്നത്.