തിരുവനന്തപുരം: വൈദ്യുതി ചാര്‍ജ് കുത്തനെ ഉയര്‍ത്തി ഉപഭോക്താക്കളെ പ്രതിസന്ധിയിലാക്കിയ കെ.എസ്.ഇ.ബിക്ക് 10 ലക്ഷത്തിലധികം രൂപ കുടിശ്ശികയായി നല്‍കാനുള്ളത് 588 സ്ഥാപനങ്ങള്‍. ഇതില്‍ വാട്ടര്‍ അതോറിറ്റിയും നിരവധി സ്വകാര്യ ആശുപത്രികളും ഉള്‍പ്പെടുന്നു.
കഴിഞ്ഞ മാര്‍ച്ച് വരെയുള്ള കണക്കുകള്‍ പ്രകാരം 811.98 കോടി രൂപയാണ് വൈദ്യുതി ബോര്‍ഡിന് പിരിഞ്ഞുകിട്ടാനുള്ളത്. ഇതില്‍ 357.45 കോടി രൂപയുമായി ബന്ധപ്പെട്ട് കോടതിയില്‍ കേസുണ്ട്. 46 സ്വകാര്യ കമ്പനികള്‍ കുടിശ്ശികയിനത്തില്‍ നല്‍കാനുള്ളത് 129.69 കോടിയിലധികം രൂപയാണ്. ഈ സ്ഥാപനങ്ങളില്‍ മിക്കവയും അടച്ചുപൂട്ടി.
52.49 കോടി രൂപ റവന്യൂ റിക്കവറി നടപടികളിലാണ്. വൈദ്യുതി ബോര്‍ഡിന് ഏറ്റവും കൂടുതല്‍ പണം നല്‍കാനുള്ളത് വാട്ടര്‍ അതോറിറ്റിയാണ്. കുടിശ്ശിക പിരിച്ചെടുക്കുന്നതില്‍ കാണിച്ച അലംഭാവം വന്‍തുകകളായി മാറുകയായിരുന്നു.
കുടിശ്ശിക പിരിച്ചെടുക്കുന്നതിലൂടെ മാത്രം സാമ്പത്തിക ഭദ്രത കൈവരിക്കാന്‍ കഴിയില്ലെന്നാണ് വൈദ്യുതി ബോര്‍ഡിന്റെ നിലപാട്. ചാര്‍ജ് വര്‍ധനയിലൂടെ മാത്രമേ സാമ്പത്തികമായി രക്ഷനേടാനാകൂവെന്ന് സര്‍ക്കാരിനെ അറിയിച്ചതിന്റെ പശ്ചാത്തലത്തിലാണ് നിരക്ക് വര്‍ധിപ്പിച്ചത്.