റാസൽഖൈമ: റാസൽഖൈമയിലെ ഷെയ്ഖ് മുഹമ്മദ് ബിൻ സലേം സ്ട്രീറ്റിലെ ഷെയ്ഖ് മുഹമ്മദ് ബിൻ സായിദ് റൗണ്ട് എബൗട്ട് (അൽ റഫാ) മുതൽ അൽ മർജാൻ ഐലൻഡ് റൗണ്ട് എബൗട്ട് വരെയുള്ള വേഗപരിധി ജനുവരി 17 മുതൽ മണിക്കൂറിൽ 80 കിലോമീറ്ററായി കുറയും. നിലവിലെ വേ​ഗപരിധി മണിക്കൂറിൽ 100കിലോമീറ്ററായിരുന്നു.

 

റോഡിലെ അമിതവേഗത മൂലമുണ്ടാകുന്ന അപകടങ്ങൾ കുറക്കാനാണ് തീരുമാനമെന്ന് റാസൽഖൈമ പൊലിസിൻ്റെ ജനറൽ കമാൻഡിലെ സെൻട്രൽ ഓപ്പറേഷൻസ് ഡയറക്ടർ ജനറൽ ബ്രിഗേഡിയർ അഹമ്മദ് അൽ സാം അൽ നഖ്ബി പറഞ്ഞു.

 

ഷെയ്ഖ് മുഹമ്മദ് ബിൻ സായിദ് റൗണ്ട് എബൗട്ടിൽ നിന്ന് ആരംഭിച്ച് അൽ റിഫ, അൽ ജാസിറ അൽ ഹംറ, മിന അൽ അറബ് എന്നിവിടങ്ങളിലൂടെ അൽ മർജനിൽ എത്തുന്നതിന് മുമ്പായി ഈ റോഡ് റെസിഡൻഷ്യൽ, ടൂറിസ്റ്റ്, വാണിജ്യ മേഖലകളിലൂടെ കടന്നുപോകുന്നതിനാൽ ഇത് ഒരു സുപ്രധാന പാതയായി കണക്കാക്കപ്പെടുന്നു.