ന്യൂഡല്‍ഹി: ബി.ജെ.പിയുടെ കോര്‍പറേറ്റ് സ്‌നേഹത്തിലൂടെ അവരുടെ കൈകളിലെത്തുന്നത് കോടികള്‍. പാര്‍ട്ടി പ്രവര്‍ത്തന ഫണ്ടിലേക്കെന്ന് പറഞ്ഞ് കോര്‍പറേറ്റുകള്‍ 2016-17, 2017-18 സാമ്പത്തിക വര്‍ഷങ്ങളില്‍ കൈപ്പറ്റിയത് 915.596 കോടി രൂപയാണ്.
അസോസിയേഷന്‍ ഫോര്‍ ഡെമോക്രാറ്റിക് റിഫോംസ്(എ.ഡി.ആര്‍) പുറത്തുവിട്ട റിപ്പോര്‍ട്ടിലാണ് ഇക്കാര്യം വെളിപ്പെടുത്തിയത്. അതേസമയം ഇതേ കാലത്ത് കോണ്‍ഗ്രസിന് ലഭിച്ചതാകട്ടെ 55.36 കോടി രൂപമാത്രമാണ്.
ദേശീയ പാര്‍ട്ടികള്‍ക്ക് തെരഞ്ഞെടുപ്പുകാലത്ത് ലഭിച്ച സംഭാവനകളെക്കുറിച്ച് വെളിപ്പെടുത്തണമെന്ന് തെരഞ്ഞെടുപ്പ് കമ്മിഷന്‍ നിര്‍ദേശിച്ചിരുന്നു. ബി.ജെ.പി, കോണ്‍ഗ്രസ്, നാഷനല്‍ കോണ്‍ഗ്രസ് പാര്‍ട്ടി, സി.പി.ഐ, സി.പി.എം, തൃണമൂല്‍ കോണ്‍ഗ്രസ് എന്നീ ആറ് രാഷ്ട്രീയ പാര്‍ട്ടികളോടാണ് തെരഞ്ഞെടുപ്പ് കമ്മിഷന്‍ സംഭാവന സംബന്ധിച്ച കണക്ക് ചോദിച്ചിരുന്നത്.
ഇതില്‍ ഏറ്റവും കൂടുതല്‍ സംഭാവന ലഭിച്ചത് ബി.ജെ.പിക്കാണ്. 1731 കോര്‍പറേറ്റുകളാണ് ബി.ജെ.പിക്ക് സംഭാവന നല്‍കിയത്. മൊത്തം സംഭാവനയുടെ 94 ശതമാനവും ലഭിച്ചത് ബി.ജെ.പിക്കാണ്. കോണ്‍ഗ്രസിന് സംഭാവന ല്‍കിയത് 151 പേരാണ്. എന്‍.സി.പിക്ക് 7.73 കോടി, സി.പി.എമ്മിന് 4.42 കോടി, തൃണമൂല്‍ കോണ്‍ഗ്രസിന് 2.03 കോടി എന്നിങ്ങനെ ലഭിച്ചപ്പോള്‍ സി.പി.ഐക്ക് രണ്ട് ശതമാനം മാത്രമാണ് ലഭിച്ചത്.