കൊണ്ടോട്ടി: വിമാനത്താവളത്തിന്റെ സാമ്പത്തിക സ്ഥിതി വിലയിരുത്തുന്നതിനായി എയര്‍പോര്‍ട്ട് ഇക്കണോമിക് റഗുലേറ്ററി അതോറിറ്റി ഉദ്യോഗസ്ഥര്‍ കരിപ്പൂരിലെത്തി. ഡല്‍ഹിയില്‍ നിന്നെത്തിയ വ്യോമയാന മന്ത്രാലയത്തിന്റെ ഉന്നതസംഘം ഇന്ന് വിമാനത്താവളത്തില്‍ പരിശോധന നടത്തും.
അതോറിറ്റി ചെയര്‍മാന്‍ മചീന്ദ്രനാഥ്, എസ്.എന്‍. ശങ്കര്‍ എന്നിവരടങ്ങിയ സംഘമാണ് ഇന്നലെ രാത്രിയില്‍ കരിപ്പൂരിലെത്തിയത്. വരുമാനവും ചെലവും കണക്കാക്കുക, തുടര്‍ നടപടികള്‍ സ്വീകരിക്കുക എന്നിവയാണ് പരിശോധനയുടെ ലക്ഷ്യം. യാത്രക്കാരും വിമാന സര്‍വിസുകളും വര്‍ധിച്ചിട്ടും കഴിഞ്ഞ സാമ്പത്തിക വര്‍ഷത്തില്‍ കരിപ്പൂരിന്റെ നഷ്ടം നാല് കോടിയായി ഉയര്‍ന്നിരുന്നു. ഇതടക്കമുള്ള വിഷയങ്ങള്‍ സംഘം പരിശോധിക്കും.
വിമാനത്താവളത്തിന്റെ വരുമാനം വര്‍ധിപ്പിക്കാനാവശ്യമായ നിര്‍ദേശങ്ങള്‍ ഇവര്‍ നല്‍കും. രണ്ടുവര്‍ഷമായി വലിയ വിമാനങ്ങളുടെ പിന്മാറ്റം മൂലം കരിപ്പൂരിന് കോടികളുടെ വരുമാന നഷ്ടമാണ് ഉണ്ടാകുന്നത്.