പൂച്ചാക്കല്‍: തൈക്കാട്ടുശേരി ബ്ലോക്കില്‍ നടപ്പിലാക്കുന്ന സ്റ്റാര്‍ട്ടപ്പ് വില്ലേജ് സംരംഭകത്വ പദ്ധതി ധനമന്ത്രി ഡോ. ടി.എം തോമസ് ഐസക്ക് ഉദ്ഘാടനം ചെയ്തു.
നടന്‍ മോഹന്‍ലാല്‍ വരെ അച്ചാര്‍ വില്‍പന നടത്തുന്ന ഇക്കാലത്ത് സ്റ്റാര്‍ട്ടപ്പ് വില്ലേജ് സംരംഭകത്വ പദ്ധതിക്ക് ഏറെ പ്രസക്തിയുണ്ടെന്ന് അദ്ദേഹം പറഞ്ഞു.
ആലപ്പുഴ ജില്ലയില്‍ തൈക്കാട്ടുശ്ശേരി ബ്ലോക്കില്‍ മാത്രമാണ് ഈ പദ്ധതി നടപ്പിലാക്കുന്നത്. കേന്ദ്ര സംസ്ഥാന സര്‍ക്കാരുകളുടെ സാമ്പത്തിക സഹായത്താല്‍ ഗ്രാമീണ മേഖലയില്‍ ദാരിദ്ര്യ നിര്‍മാര്‍ജനം ലക്ഷ്യമിട്ട് നടപ്പിലാക്കുന്ന പദ്ധതിയാണിത്. സ്വന്തമായി സംരംഭങ്ങള്‍ തുടങ്ങുവാനും വിജയകരമായി നിലനിര്‍ത്താനും ഗ്രാമീണ ജനതയെ സഹായിക്കുന്ന പദ്ധതിയാണിത്. അടുത്ത നാല് വര്‍ഷത്തിനുള്ളില്‍ 1561 സൂക്ഷ്മ സംരംഭങ്ങള്‍ തൈക്കാട്ടുശ്ശേരി ബ്ലോക്കില്‍ ആരംഭിക്കുമെന്നും ചടങ്ങില്‍ ബ്ലോക്ക് പഞ്ചായത്ത് പ്രസിഡന്റ് നിര്‍മലാ ശെല്‍വരാജ് പറഞ്ഞു.എ.എം ആരിഫ് എം.എല്‍.എ അധ്യക്ഷനായി. കുടുംബശ്രീ ജില്ലാ മിഷന്‍ കോഡിനേറ്റര്‍ സൂജ ഈപ്പന്‍ പദ്ധതി വിശദീകരിച്ചു. ജില്ലാ പഞ്ചായത്തംഗം പി.എം പ്രമോദ്, സിന്ധു വിനു, ഗ്രാമപഞ്ചായത്ത് പ്രസിഡന്റുമാരായ രാജേഷ് വിവേകാനന്ദ, ആബിദ അസീസ്, കെ.എസ് ഷിബു, ശാന്തമ്മ പ്രകാശ്, പി.ആര്‍ ഹരിക്കുട്ടന്‍, പി.ജി മുരളി, മേഘാ വേണു, ജോര്‍ജ് ജോസഫ് സംസാരിച്ചു. ഇതോടനുബന്ധിച്ച് ബ്ലോക്കിലെ കുടുംബശ്രീ സംരംഭങ്ങളുടെ പ്രദര്‍ശനവും വിപണനവും ഭക്ഷ്യമേളയും നടന്നു.