പത്തനംതിട്ട: ശബരിമലയില്‍ എല്ലാ പ്രായത്തിലുമുള്ള സ്ത്രീകള്‍ക്കും പ്രവേശിക്കാമെന്ന് സുപ്രിം കോടതി വിധി വന്നു. എന്നാല്‍, വിശ്വാസികളായ സ്ത്രീകള്‍ ശബരിമലയില്‍ വരുമെന്ന് പ്രതീക്ഷിക്കുന്നില്ലെന്ന് ദേവസ്വം ബോര്‍ഡ് പ്രസിഡന്റ് എ.പത്മകുമാര്‍ പറഞ്ഞു. വിധിക്കെതിരേ പുനഃപരിശോധന ഹരജി നല്‍കുന്നത് സംബന്ധിച്ച് ദേവസ്വത്തിന്റെ പരിഗണനയിലാണെന്ന് പത്മകുമാര്‍ പറഞ്ഞു.

ശബരിമല വിധിക്കെതിരെ ദേവസ്വം ബോര്‍ഡ് പുനപ്പരിശോധന ഹരജി നല്‍കണമെന്ന് പ്രതിപക്ഷ നേതാവ് രമേശ് ചെന്നിത്തല ആവശ്യപ്പെട്ടു. സര്‍ക്കാരും ദേവസ്വം ബോര്‍ഡും രണ്ട് തട്ടിലാണ്. സുപ്രീംകോടതി വിധിയുണ്ടാക്കുന്ന സാമൂഹ്യ പ്രത്യാഘാതവും ബുദ്ധിമുട്ടും പരിഗണിക്കണമെന്നും ചെന്നിത്തല പറഞ്ഞു.