കവര്‍ച്ച വളര്‍ത്തുനായയെ മയക്കിയ ശേഷം
ആലുവ: വീട്ടുകാര്‍ പുറത്തുപോയ സമയത്ത് വീട് കുത്തിത്തുറന്ന് 30 ലക്ഷത്തോളം രൂപ വില വരുന്ന ആഭരണങ്ങളും പണവും കവര്‍ന്നു. ആലുവ തോട്ടക്കാട്ടുകര ജി.സി.ഡി.എ റോഡ് പൂണെലില്‍ ജോര്‍ജ് മാത്യുവിന്റെ വീട്ടിലാണ് കവര്‍ച്ച നടന്നത്.
വളര്‍ത്തുനായയെ മയക്കിയ ശേഷമാണ് കവര്‍ച്ച നടത്തിയവര്‍ വീടിന് അകത്ത് കടന്നത്. മര അലമാരയുടെ അകത്തെ ഡിജിറ്റല്‍ ലോക്കറില്‍ സൂക്ഷിച്ചിരുന്ന 20 ലക്ഷം രൂപയുടെ വജ്രാഭരണങ്ങള്‍, 65,000 രൂപ, 2000 യു.എസ് ഡോളര്‍, 800 പൗണ്ട്, 40 പവന്‍ സ്വര്‍ണം തുടങ്ങിയവയാണ് നഷ്ടമായത്. വെള്ളിയാഴ്ച വൈകിട്ട് 6.30നും 11.30നുമിടക്കാണ് കവര്‍ച്ച നടന്നത്. എറണാകുളത്ത് ഒരു ചടങ്ങില്‍ പങ്കെടുത്ത് രാത്രി 11.30 ഓടെ തിരിച്ചെത്തിയപ്പോഴാണ് വീട്ടുകാര്‍ മോഷണ വിവരമറിഞ്ഞത്. ഉടന്‍ ആലുവ ഈസ്റ്റ് പൊലിസില്‍ വിവരം അറിയിക്കുകയായിരുന്നു. വിദേശത്തായിരുന്ന വീട്ടുകാര്‍ കുറച്ച് ദിവസങ്ങള്‍ക്ക് മുന്‍പാണ് ആഭരണങ്ങള്‍ ബാങ്കില്‍ നിന്നെടുത്തത്. ഫൊറന്‍സിക് വിദഗ്ധരും പൊലിസും സ്ഥലത്തെത്തി അന്വേഷണമാരംഭിച്ചു.