പാലക്കാട്: തച്ഛനാട്ടുകര പഞ്ചായത്ത് ഇനി സലീം മാഷ് ഭരിക്കും. വികലാംഗത്വം ചൂണ്ടിക്കാണിച്ച് എതിര്‍പാര്‍ട്ടിക്കാര്‍ പരിഹസിച്ച് പ്രസംഗിച്ച സലീം മാഷ് പഞ്ചായത്തില്‍ നാട്ടുകാരോടൊപ്പമുണ്ടാവും. ഒറ്റ വോട്ടിന് കഴിഞ്ഞ പ്രാവശ്യം നഷ്ടപ്പെട്ട 11-ാം വാര്‍ഡില്‍ 305 വോട്ടുകളുടെ ഭൂരിപക്ഷത്തോടെയാണ് യു.ഡി.എഫ് സ്ഥാനാഥിയായി മത്സരിച്ച സലീം മാസ്റ്റര്‍ തിരിച്ചുപിടിച്ചത്. പരിഹാസച്ചൂടിനെ കൂടി മറികടന്ന് നേടിയ ആ വിജയത്തിന് പത്തരമാറ്റേകുന്നതാണ് പുതിയ നിയോഗം.

'ഒരു അതിര്‍ത്തി തര്‍ക്കം വന്നാല്‍ അവിടെ വന്ന് ഇടപെടാന്‍ പറ്റ്വോ? ഒരു കല്യാണത്തിന് പന്തല് വലിച്ചുകെട്ടാന്‍ പറ്റ്വോ? അവിടെ അറുക്കുമ്പോ, അതിന്റെ കൂടെ നിന്ന് ചെയ്യെടാ മക്കളേന്ന് പറഞ്ഞിട്ട് കൂടെ നിക്കാന്‍ വേണ്ടി പറ്റുമോ? കളിക്കളത്തില്‍ കൂട്ടുകാരോടൊപ്പം നിന്ന് കളിക്കാന്‍ പറ്റുമോ?...' ഇങ്ങനെ പോകുന്ന ഡി.വൈ.എഫ്.ഐ നേതാവ് കൂടിയായ പ്രസംഗകന്റെ പരിഹാസം. ഇതിനിടയില്‍ കൂടിനിന്ന ആളുകള്‍ കൈയ്യടിച്ച് ആവേശം കൊള്ളുന്നതും വീഡിയോയില്‍ കാണാമായിരുന്നു.

മുസ്‌ലിം യൂത്ത് ലീഗ് പാലക്കാട് ജില്ലാ സീനിയര്‍ വൈസ് പ്രസിഡന്റാണ് സലീം മാസ്റ്റര്‍. അദ്ദേഹത്തെ അവഹേളിച്ചുള്ള വീഡിയോ പുറത്തുവന്നതിനു പിന്നാലെ, യൂത്ത് ലീഗ് സംസ്ഥാന പ്രസിഡന്റ് മുനവ്വറലി ശിഹാബ് തങ്ങളും സലീം മാസ്റ്റര്‍ക്ക് വേണ്ടി പ്രചാരണത്തിനെത്തിയിരുന്നു.