അഞ്ചല്‍: വാഹന പരിശോധനക്കിടെ എക്‌സൈസ് സംഘത്തിന് നേരെ വ്യാജ മദ്യ ലോബിയുടെ ആക്രമണം. ഹെല്‍മറ്റ് കൊണ്ടുള്ള അടിയില്‍ പരുക്കേറ്റ പുനലൂര്‍ എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ഓഫിസിലെ പ്രിവന്റീവ് ഓഫിസര്‍ റെജി, സിവില്‍ എക്‌സൈസ് ഓഫിസര്‍ അനീഷ് എന്നിവരെ ആശുപത്രിയില്‍ പ്രവേശിപ്പിച്ചു. കണ്ണിന് സാരമായി പരുക്കേറ്റ റെജിയെ തിരുവനന്തപുരം മെഡിക്കല്‍ കോളജ് ആശുപത്രിയിലേക്ക് മാറ്റി.
തിരുവനന്തപുരത്ത് നിന്നും ചാരായം കവറുകളിലാക്കി ആവശ്യക്കാര്‍ക്ക് എത്തിക്കുന്ന സംഘം സജീവമാണെന്ന് ലഭിച്ച രഹസ്യ വിവരത്തിന്റെ അടിസ്ഥാനത്തില്‍ പരിശോധന നടത്തുകയായിരുന്നു എക്‌സൈസ് സംഘം. അതിനിടെ ഇരുചക്ര വാഹനം നിര്‍ത്താതെ പോവുകയും എക്‌സൈസ് സംഘം ഈ വാഹനത്തെ പിന്തുടര്‍ന്ന് പിടികൂടുകയും ചെയ്തു. ഇതിനിടയിലാണ് വാഹനത്തിലുള്ളവര്‍ എക്‌സൈസ് സംഘത്തെ ഹെല്‍മറ്റ് കൊണ്ട് ആക്രമിച്ചത്.
ആക്രമണത്തിന് ശേഷം പ്രതികള്‍ ഓടി രക്ഷപ്പെട്ടു. നെടുമങ്ങാട് സ്വദേശികളായ ചാമുണ്ടി ഉണ്ണി എന്ന് വിളിക്കുന്ന സതീശന്‍, സഹോദരന്‍ സുധന്‍ എന്നിവരാണ് എക്‌സൈസ് സംഘത്തെ ആക്രമിച്ചത്. ഇവര്‍ മുമ്പും സമാനമായ രീതിയില്‍ എക്‌സൈസ് സംഘത്തെ ആക്രമിച്ചു രക്ഷപ്പെട്ടിട്ടുണ്ട്. ആര്യനാട്, കാട്ടാക്കട എന്നിവിടങ്ങളിലെ എക്‌സൈസ് ഓഫിസര്‍മാരെ വടിവാള്‍ കൊണ്ട് വെട്ടിയതിനും ഇവര്‍ക്കെതിരേ കേസുണ്ട്.