മുംബൈ: സിതാൻഷു കൊടകിനെ ഇന്ത്യൻ ക്രിക്കറ്റ് ടീമിൻ്റെ ബാറ്റിങ് കോച്ചായി നിയമിച്ച് ബിസിസിഐ. ആഭ്യന്തര ക്രിക്കറ്റിൽ സൗരാഷ്ട്രയുടെ താരമായിരുന്ന സിതാൻഷു 2023-ൽ അയർലൻഡിനെതിരായ ട്വന്റി 20 പരമ്പരയിൽ ഇന്ത്യൻ ടീമിന്റെ കോച്ചായി പ്രവർത്തിച്ചിട്ടുണ്ട്. ഇന്ത്യൻ ടീമിന് ബാറ്റിങ് പരിശീലകനെ വേണമെന്ന ഹെഡ് കോച്ച് ഗൗതം ഗംഭീറിന്റെ ആവശ്യപ്രകാരമാണ് ബിസിസിഐ നിലവിൽ ഇന്ത്യ എ ടീം പരിശീലകനായ സിതാൻഷു കൊടകിനെ ഈ സ്ഥാനത്തേക്ക് നിയമിച്ചിരിക്കുന്നത്.

ഓസ്ട്രേലിയൻ പരമ്പരയ്ക്ക് പിന്നാലെ നടന്ന ബിസിസിഐ അവലോകന യോഗത്തിലായിരുന്നു ഗംഭീറിൻ്റെ ആവശ്യം. മുൻ ഇംഗ്ലീഷ് ക്രിക്കറ്റർ കെവിൻ പീറ്റേഴ്സണേയും ഈ സ്ഥാനത്തേക്ക് പരിഗണിച്ചിരുന്നതായാണ് റിപ്പോർട്ട്. ദേശീയ ക്രിക്കറ്റ് അക്കാദമി (എൻ.സി.എ.) യിൽ പരിശീലകനായിരുന്നു സിതാൻഷു.

ഇംഗ്ലണ്ടിനെതിരായ പരമ്പര ആരംഭിക്കുന്നതിന് മുമ്പ് അദ്ദേഹം ടീമിനൊപ്പം ചേരുമെന്നാണ് വിവരം. ആഭ്യന്തര ക്രിക്കറ്റിലെ മികച്ച താരമായ സിതാൻഷു കൊടക് 130 ഫസ്റ്റ് ക്ലാസ് മത്സരങ്ങളിൽ നിന്നായി 8061 റൺസ് നേടിയിട്ടുണ്ട്. 89 ലിസ്റ്റ് എ മത്സരങ്ങളിൽ നിന്നായി 3083 റൺസും അടിച്ചുകൂട്ടിയിട്ടുണ്ട്. മുൻ ഐപിഎൽ ഫ്രാ‍ഞ്ചൈയിയായ ഗുജറാത്ത് ലയൺസിന്റെ അസിസ്റ്റന്റ് കോച്ചായും പ്രവർത്തിച്ചിട്ടുണ്ട്.

The Board of Control for Cricket in India (BCCI) has appointed Sitanshu Kotak as the batting coach for the Indian cricket team, bringing his expertise to enhance the team's batting performance.