മംഗളൂരു: ആന്ധ്രാപ്രദേശില്‍ നിന്നു കടത്തിക്കൊണ്ടുവരികയായിരുന്ന 14 കിലോ കഞ്ചാവുമായി രണ്ടു പേരെ മംഗളൂരു സിറ്റി ക്രൈംബ്രാഞ്ച് പൊലിസ് അറസ്റ്റ് ചെയ്തു. ബണ്ട്‌വാള്‍ നരിങ്കണയിലെ അബ്ദുല്‍ അസീസ് (35), മുഹമ്മദ് മുസ്തഫ എന്ന ഗിഡി (44) എന്നിവരാണ് പിടിയിലായത്. രഹസ്യ വിവരം ലഭിച്ചതിന്റെ അടിസ്ഥാനത്തില്‍ നടത്തിയ പരിശോധനയിലാണ് കാറില്‍ കടത്തുകയായിരുന്ന കഞ്ചാവ് സഹിതം ഇവര്‍ പിടിയിലായത്. മംഗളൂരുവിന് പുറമെ മഞ്ചേശ്വരം, ഉപ്പള തുടങ്ങിയ സ്ഥലങ്ങളിലും സംഘം കഞ്ചാവ് വിതരണം ചെയ്തിരുന്നുവെന്ന് പൊലിസ് പറഞ്ഞു. കഞ്ചാവ് കടത്താന്‍ ഉപയോഗിച്ച കാറും, രണ്ട് മൊബൈല്‍ ഫോണുകളും കസ്റ്റഡിയിലെടുത്തു. അസി. കമ്മിഷണര്‍ വലെന്റൈന്‍ ഡിസൂസ, ഇന്‍സ്‌പെക്ടര്‍ ശ്യാം സുന്ദര്‍ എന്നിവരുടെ നേതൃത്വത്തിലുള്ള സംഘമാണ് പ്രതികളെ പിടികൂടിയത്.