തിരൂര്‍: താനൂര്‍ സവാദ് വധക്കേസ് പ്രതികളെ തിരൂര്‍ ജില്ലാ ആശുപത്രിയില്‍ വൈദ്യപരിശോധനയ്‌ക്കെത്തിച്ചപ്പോള്‍ സ്ത്രീകള്‍ ഉള്‍പ്പെടെയുള്ള ജനക്കൂട്ടത്തിന്റെ കൈയേറ്റശ്രമം. സവാദിന്റെ ഭാര്യ സൗജത്ത്, കാമുകന്‍ താനൂര്‍ തെയ്യാല ഓമച്ചപ്പുഴ കൊളത്തൂര്‍ ബഷീര്‍, ഇയാളുടെ സുഹൃത്ത് സൂഫിയാന്‍ എന്നിവരെ ഇന്നലെ വൈകിട്ട് 3.30നു ജില്ലാ ആശുപത്രിയിലെത്തിച്ചപ്പോഴായിരുന്നു സംഭവം.
രൂക്ഷമായ ശകാരവര്‍ഷത്തോടെയാണ് ജനക്കൂട്ടം പ്രതികളെ എതിരേറ്റത്. പ്രകോപനം കൈയേറ്റത്തിലേക്കു നീങ്ങിയെങ്കിലും പൊലിസ് ഇടപെട്ടു ജനങ്ങളെ തടയുകയായിരുന്നു. ഇവരെ ജില്ലാ ആശുപത്രിയില്‍ കൊണ്ടുവരുന്നതറിഞ്ഞു നിരവധിയാളുകളാണ് ആശുപത്രി പരിസരത്തെത്തിയിരുന്നത്.
നേരത്തേയും സൗജത്തിനെയും സൂഫിയാനെയും തിരൂര്‍ ജില്ലാ ആശുപത്രിയിലെത്തിച്ചു പൊലിസ് വൈദ്യപരിശോധന നടത്തിയിരുന്നു. അപ്പോഴും പ്രതികള്‍ക്കെതിരേ ശക്തമായ ജനകീയ പ്രതിഷേധമുണ്ടായിരുന്നു. പ്രതികളെ ഇന്നു കാസര്‍കോട്ടും കോഴിക്കോട്ടുമെത്തിച്ചു തെളിവെടുപ്പ് നടത്തും. സവാദിനെ കൊലപ്പെടുത്താനായി ഷാര്‍ജയില്‍നിന്നു ബഷീര്‍ വിമാനമാര്‍ഗം കാസര്‍കോട്ടെത്തുകയും അവിടെനിന്നു കാര്‍മാര്‍ഗം താനൂരിലെത്തുകയുമായിരുന്നു. ശേഷം സൗജത്തിനെയുംകൂട്ടി കോഴിക്കോട്ട് ഹോട്ടല്‍ മുറിയെടുത്ത് ഒരു പകല്‍ താമസിക്കുകയും ചെയ്തിരുന്നു. ഇവിടങ്ങളിലാണ് പ്രതികളെ എത്തിച്ച് തെളിവെടുപ്പ് നടത്തുക.