താനൂര്‍: തീരദേശ അക്രമങ്ങളുടെ പാശ്ചാത്തലത്തില്‍ സര്‍വകക്ഷി യോഗ തീരുമാനങ്ങള്‍ നടപ്പിലാക്കാന്‍ താനൂര്‍ എം.എല്‍.എ ഇടപെടാത്തതില്‍ പ്രതിഷേധിച്ചു മുസ്‌ലിം ലീഗ് സര്‍ക്കാര്‍ ഉദ്ഘാടനങ്ങള്‍ ബഹിഷ്‌കരിച്ചു.
ഇന്നലെ നടന്ന കാട്ടിലങ്ങാടി സ്‌കൂള്‍, മീനടത്തൂര്‍ സ്‌കൂള്‍ എന്നിവയുടെ ഉദ്ഘാടനങ്ങളാണ് ലീഗ് ബഹിഷ്‌കരിച്ചത്. മാര്‍ച്ചു 12നു തീരദേശത്തുണ്ടായ സി.പി.എം, പൊലിസ് അതിക്രമങ്ങള്‍ക്കെതിരേ വിളിച്ചു ചേര്‍ത്ത രണ്ടു സര്‍വകക്ഷി യോഗ തീരുമാനങ്ങളും ഇതുവരെയും നടപ്പിലായിട്ടില്ല. പ്രദേശം ഇപ്പോഴും പൊലിസ് കാവലിലാണ്.
മാര്‍ച്ച് 19നു മന്ത്രി കെ.ടി ജലീല്‍ വിളിച്ചു ചേര്‍ത്ത സമാധാന യോഗത്തില്‍ 11 തീരുമാനങ്ങളാണ് കൈകൊണ്ടിരുന്നത്. ഇതില്‍ ഒന്നു പോലും ഇതുവരെയും നടപ്പിലായിട്ടില്ല. സര്‍വകക്ഷി സമാധാന റാലിയും പ്രത്യേക ഗ്രാമസഭയും കടലാസില്‍ തന്നെയാണുള്ളത്. തീരുമാനങ്ങള്‍ നടപ്പിലാക്കാന്‍ മുന്‍കൈയെുക്കേണ്ട എം.എല്‍.എ പ്രദേശത്തേക്ക് ഇതുവരെയും തിരിഞ്ഞു നോക്കിയിട്ടില്ല. ലക്ഷങ്ങളുടെ നാശനഷ്ടമാണ് മത്സ്യത്തൊഴിലാളികള്‍ക്കുണ്ടായത്. വീടുകള്‍, വാഹനങ്ങള്‍, മത്സ്യബന്ധനഉപകരണങ്ങള്‍ എല്ലാം സംഘര്‍ഷത്തില്‍ തകര്‍ന്നിരുന്നു. റമദാനില്‍ പോലും തീരദേശ ജനത ദുരിത ജീവിതം നയിക്കുമ്പോള്‍ എം.എല്‍.എ മുഖം തിരിഞ്ഞു നില്‍ക്കുന്നത് ജനങ്ങളോട് ചെയ്യുന്ന കൊടുംപാതകമാണെന്ന് മുസ്‌ലലീഗ് മണ്ഡലം പ്രസിഡന്റ് കെ. എന്‍ മുത്തുക്കോയ തങ്ങളും സെക്രട്ടറി എം.പി അഷ്ഫും പ്രസ്താവനയില്‍ പറഞ്ഞു.