20 സെന്റ് സ്ഥലത്താണ് പൈതൃക  സ്മാരക ങ്ങള്‍ നിലകൊള്ളുന്നത്.  ചുറ്റുമതില്‍  ഇല്ലാത്തതിനാല്‍  ഈ പൈതൃക  സ്മാരക ങ്ങള്‍  തെരുവ്  നായ്ക്കളുടെയും സാമൂഹ്യ വിരുദ്ധരുടേയും  താവളമായി മാറിയിരിക്കുകയാണ്
പുത്തന്‍ചിറ: നൂറ്റാണ്ടുകളുടെ കഥപറയുന്ന പുത്തന്‍ചിറ ഗ്രാമപഞ്ചായത്തിലെ  കരിങ്ങാച്ചിറയില്‍ സ്ഥിതി ചെയ്യുന്ന   രാജഭരണകാലത്ത് നിര്‍മിക്കപ്പെട്ട പൈതൃക  സ്മരണകള്‍ക്ക്  ചുറ്റുമതില്‍   നിര്‍മിക്കുന്നു. രാജഭരണകാലത്തെ  പോലീസ്  സ്റ്റേഷന്‍,അഞ്ചല്‍പ്പെട്ടി,പുരാതനമായ കിണര്‍ എന്നീ പൈതൃക സ്മരണകള്‍ ഉള്‍പ്പെടുന്ന സ്ഥലമാണ്   ചുറ്റുമതില്‍  കെട്ടി സംരക്ഷിക്കുന്നത് .  ഇതിനായി  5 ലക്ഷം  രൂപയാണ് ഗ്രാമപഞ്ചായത്ത്  പ്ലാന്‍ ഫണ്ടില്‍  ഉള്‍പ്പെടുത്തി  അനുവദിച്ചിട്ടുള്ളതെ ഗ്രാമപഞ്ചായത്ത് വികസന കാര്യ സ്റ്റാന്റിങ് കമ്മിറ്റി  ചെയര്‍മാന്‍  പി ഐ നിസാര്‍  അറിയിച്ചു .
20 സെന്റ് സ്ഥലത്താണ് ഈ പൈതൃക  സ്മാരക ങ്ങള്‍ നിലകൊള്ളുന്നത്.  ചുറ്റുമതില്‍  ഇല്ലാത്തതിനാല്‍  ഈ പൈതൃക  സ്മാരക ങ്ങള്‍  തെരുവ്  നായ്ക്കളുടെയും സാമൂഹ്യ വിരുദ്ധരുടേയും  താവളമായി മാറിയിരിക്കുകയാണ് .  കാലപ്പഴക്കത്തില്‍ തകര്‍ന്ന നിലയിലായിരുന്ന തിരുവിതാംകൂര്‍ രാജ ഭരണകാലത്ത് നിര്‍മിച്ച പൊലീസ് എയ്ഡ് പോസ്റ്റ്  ഏതാനും  മാസങ്ങള്‍ക്ക്  മുമ്പ്  പഞ്ചായത്ത്  നവീകരിച്ചിരുന്നു.
ഈ ചരിത്രസ്മാരകങ്ങള്‍  സംരക്ഷിക്കണമെന്ന പ്രദേശവാസികളുടെയും ചരിത്രകുതുകികളുടെയും ഏറെനാളത്തെ മുറവിളിയ്‌ക്കൊടുവിലാണ് ഗ്രാമപഞ്ചായത്ത് മുന്‍കൈയ്യെടുത്ത് സ്മാരകങ്ങളുടെ  സംരക്ഷണം ഏറ്റെടുത്തത്. കെട്ടിടത്തിന്റെ കേടുപാടുകള്‍ തീര്‍ക്കുകയും കഴുക്കോലുകള്‍ മാറ്റി സ്ഥാപിക്കുകയും നിലത്ത് ടൈല്‍ വിരിക്കുകയും പെയിന്റ് ചെയ്ത് മനോഹരമാക്കുകയും ചെയ്തു.  ഇതിന് സമീപമുള്ള മറ്റൊരു സ്മാരകമായ അഞ്ചല്‍പെട്ടിക്ക് സംരക്ഷണ മേല്‍ക്കൂര നിര്‍മച്ചു.
തൊട്ടടുത്തുള്ള പുരാതനമായ കിണറിന് മുകളില്‍ ഇരുമ്പ്  വല സ്ഥാപിച്ചിട്ടുണ്ട്.   രണ്ട് ലക്ഷം രൂപ ചെലവഴിച്ചാണ് നവീകരണ നടത്തിയത്.തിരുവിതാംകൂര്‍, കൊച്ചി രാജ്യങ്ങള്‍ അതിര്‍ത്തി പങ്കിടുന്ന പ്രദേശത്തായിരുന്നു പൊലീസ് എയ്ഡ് പോസ്റ്റ് പ്രവര്‍ത്തിച്ചിരുന്നത്.കൊച്ചിയുടേയും തിരുവിതാംകൂറിന്റേയും അതിര്‍ത്തിയായ ഇവിടെ കള്ളക്കടത്തുകള്‍ തടയാനും അതിര്‍ത്തി കടന്നുള്ള കുറ്റകൃത്യങ്ങള്‍ തടയാനുമായാണ് ലോക്കപ്പടക്കമുള്ള പൊലീസ് സ്റ്റേഷന്‍ പ്രവര്‍ത്തിച്ചിരുന്നത്.
പുകയില, ചെങ്കല്ല് തുടങ്ങിയവയായിരുന്നു അന്ന് അതിര്‍ത്തി കടത്തിയിരുന്നത്. ഐക്യ കേരളം നിലവില്‍ വന്നതോടെ പ്രവര്‍ത്തനം നിര്‍ത്തുകയായിരുന്നു. പിന്നീട് ആരാലും ശ്രദ്ധിക്കപ്പെടാതെ ഈ സ്മാരകങ്ങള്‍ നശിക്കുകയായിരുന്നു.
ആകെ പൊട്ടിപ്പൊളിഞ്ഞ് ചോര്‍ച്ചയുണ്ടായി ചുമരുകള്‍ പോലും നശിച്ചു കൊണ്ടിരിക്കുന്ന അവസ്ഥയിലായിരുന്നു പൊലീസ് സ്റ്റേഷന്‍ കെട്ടിടമാണ് നവീകരിചച്ചത്.  പുരാവസ്തു വകുപ്പ് ഏറ്റെടുക്കുകയോ മുസിരിസ് പൈതൃക പദ്ധതിയില്‍ പെടുത്തുകയോ ചെയ്യണമെന്ന ജനാവശ്യത്തിന് നേരെ കണ്ണടക്കുകയാണ് ബന്ധപ്പെട്ട അധികൃതര്‍.