ചീമേനി: കയ്യൂര്‍ ഞണ്ടാടിയിലെ സ്‌നേഹതീരം ബഡ്‌സ് സ്‌കൂള്‍ കുട്ടികള്‍ വിഷമതകളെല്ലാം മറന്നു ചെയ്ത കൃഷിയില്‍ നൂറുമേനി. എന്‍ഡോസള്‍ഫാന്‍ ദുരിതബാധിതരായ മുപ്പതുകുട്ടികളാണ് ഇവിടെയുള്ളത്. കുട്ടികള്‍ നട്ടുവളര്‍ത്തിയ പച്ചക്കറികളെല്ലാം അവര്‍ക്കുതന്നെ വച്ചു വിളമ്പി. ഒന്നര കോടി രൂപ ചെലവഴിച്ചു പുതിയ കെട്ടിടം നിര്‍മിച്ചിട്ടുണ്ടെങ്കിലും താത്കാലിക സംവിധാനത്തിലാണ് ഇപ്പോള്‍ വിദ്യാലയത്തിന്റെ പ്രവര്‍ത്തനം.
അതിനാല്‍ ഇവിടെ കൃഷി ചെയ്യാന്‍ സ്ഥലം പരിമിതമാണ്. എല്ലാവിധ സൗകര്യങ്ങളോടും കൂടിയ വിശാലമായ ക്ലാസ് മുറികളും മറ്റ് അനുബന്ധ സൗകര്യങ്ങളുമായാണ് കയ്യൂരില്‍ കെട്ടിടം നിര്‍മിച്ചിട്ടുള്ളത്.
ഇവിടേക്കു മാറിയാല്‍ മികച്ച രീതിയില്‍ കൃഷിയിറക്കാനാകുമെന്നാണു കണക്കു കൂട്ടല്‍. അധ്യാപികമാരായ സുനിത, ആര്യ, ജീവനക്കാരായ ശോഭ, സതി, സുഭാഷ് എന്നിവര്‍ പിന്തുണ നല്‍കി.