അബ്ദുസ്സലാം കൂടരഞ്ഞി
മക്ക: മക്കയില്‍ നടക്കുന്ന കിംഗ് അബ്ദുല്‍ അസീസ് രാജ്യാന്തര ഖുര്‍ആന്‍ പാരായണ, മനഃപാഠ, വ്യാഖ്യാന മത്സരത്തിനു തുടക്കമായി.
മക്കയിലെ മസ്ജിദുല്‍ ഹറാമില്‍ ശനിയാഴ്ച്ച ആരംഭിച്ച ഖുര്‍ആന്‍ പാരായണ മത്സരം നാലു ദിവസം നീണ്ടുനില്‍ക്കും.
103 രാജ്യങ്ങളില്‍നിന്നായി നടത്തിയ തിരഞ്ഞെടുപ്പുകളില്‍ വിജയിച്ച 146 മത്സരാര്‍ഥികളാണ് മക്കയില്‍ നടക്കുന്ന ഫൈനല്‍ റൗണ്ടുകളില്‍ പങ്കെടുക്കുന്നത്.
കേരളത്തില്‍നിന്നുള്ള ഷഹീന്‍ പാറകോട്ടും മത്സരത്തില്‍ പങ്കെടുക്കുന്നുണ്ട്.
ബ്രസീലില്‍നിന്നുള്ള ഏഴു വയസുകാരന്‍ ശിബില്‍ മുഹമ്മദ് സാലി എന്ന വിദ്യാര്‍ഥിയാണ് ഏറ്റവും പ്രായം കുറഞ്ഞ മത്സരാര്‍ഥി.
അഞ്ചു വിഭാഗങ്ങളായാണ് മത്സരം നടക്കുന്നത്. മത്സര വിജയികള്‍ക്കായി കാത്തിരിക്കുന്നത് 11,45,000 റിയാല്‍ (21,887,332 രൂപ) യുടെ മൂല്യമുള്ള സമ്മാനങ്ങളാണ്.
പന്ത്രണ്ടു വിജയികള്‍ക്കാണ് ഇതു വിതരണം ചെയ്യുക. വിവിധ വിഭാഗങ്ങളിലായി പ്രാഥമിക മത്സരങ്ങള്‍ ക്‌ളോക്ക് മക്ക ഫെയര്‍ മൗണ്ട് ഹോട്ടലില്‍വച്ചാണ് നടക്കുന്നത്.
പ്രാഥമിക യോഗ്യതാ മത്സരങ്ങളില്‍ എണ്‍പത് ശതമാനം മാര്‍ക്കുകള്‍ നേടി ജയിക്കുന്നവര്‍ക്കാണ് മക്കയിലെ മസ്ജിദുല്‍ ഹറാമില്‍ വച്ചു നടക്കുന്ന അവസാനവട്ട മത്സരത്തില്‍ പങ്കെടുക്കാന്‍ അവസരം ലഭിക്കുന്നത്.
സഊദി മതകാര്യ വകുപ്പിനു കീഴിലെ ഖുര്‍ആന്‍ പാരായണ കമ്മിറ്റിക്കു കീഴിലായി 14 കമ്മിറ്റികളാണ് തയാറാക്കിയിരിക്കുന്നത്.
മുന്‍ വര്‍ഷങ്ങളിലായി ഇതുവരെ 6300 മത്സരാര്‍ഥികളാണ് കിംഗ് അബ്ദുല്‍ അസീസ് രാജ്യാന്തര ഖുര്‍ആന്‍ പാരായണ മത്സരത്തില്‍ പങ്കെടുത്തിരിക്കുന്നത്.