കിങ്സ്റ്റന്‍: വെസ്റ്റിന്‍ഡീസിനെതിരായ രണ്ടാം ക്രിക്കറ്റ് ടെസ്റ്റില്‍ ഇന്ത്യ ഇന്നിങ്‌സ് ജയത്തിലേക്ക്. ആദ്യ ഇന്നിങ്‌സില്‍ 304 റണ്‍സിന്റെ വമ്പന്‍ ലീഡ് സ്വന്തമാക്കിയ ഇന്ത്യ അഞ്ചാം ദിനം വിന്‍ഡീസിനെ സമ്മര്‍ദത്തിലേക്ക് തള്ളിയിടുകയായിരുന്നു. ആദ്യ സെഷനില്‍ ഒടുവില്‍ വിവരം ലഭിക്കുമ്പോള്‍ അഞ്ചു വിക്കറ്റ് നഷ്ടത്തില്‍ 169 എന്ന നിലയിലാണ് വിന്‍ഡീസ്. അഞ്ചു വിക്കറ്റ് ശേഷിക്കെ ഇന്ത്യയുടെ ഒന്നാമിന്നിങ്‌സ് സ്‌കോറിനടുത്തെത്താന്‍ വിന്‍ഡീസിന് ഇനിയും 135 റണ്‍സ് ആവശ്യമാണ്. ജെര്‍മെയ്ന്‍ ബ്ലാക്‌വുഡ്(63) മികച്ച ബാറ്റിങ് കാഴ്ച്ചവച്ചെങ്കിലും മറ്റുള്ളവര്‍ നിരാശപ്പെടുത്തി. ബ്ലാക്‌വുഡ് ആദ്യ ഇന്നിങ്‌സില്‍ എന്ന പോലെ ഇന്ത്യന്‍ ബൗളിങിനെ കടന്നാക്രമിച്ചു. 54 പന്തില്‍ ഒന്‍പതു ബൗണ്ടറിയും രണ്ടു സിക്‌സറും ഇന്നിങ്‌സിലുണ്ടായിരുന്നു. റോസ്റ്റന്‍ ചേസ്(29*) ഷെയ്ന്‍ ഡോവ്‌റിച്ച്(6*) എന്നിവരാണ് പുറത്താവാതെ ക്രീസിലുള്ളത്.

കാര്‍ലോസ് ബ്രാത്ത്‌വൈറ്റ്(23) രാജേന്ദ്ര ചന്ദ്രിക(1) ഡാരന്‍ ബ്രാവോ(20) മര്‍ലോണ്‍ സാമുവല്‍സ്(0) എന്നിവരാണ് നാലാം ദിനം പുറത്തായ താരങ്ങള്‍. ഇന്ത്യന്‍ നിരയില്‍ മുഹമ്മദ് ഷമി രണ്ടു വിക്കറ്റെടുത്തു. ഇഷാന്ത് ശര്‍മ, അശ്വിന്‍, അമിത് മിശ്ര എന്നിവര്‍ക്ക് ഓരോ വിക്കറ്റ് ലഭിച്ചു.