കോഴിക്കോട്: വ്യാജ കോഴ്‌സ് നടത്തി വഞ്ചിച്ചുവെന്നാരോപിച്ച് മാവൂര്‍ റോഡ് ജങ്ഷനിലെ എയിംഫില്‍ സ്ഥാപനത്തിന് മുന്നില്‍ വിദ്യാര്‍ഥികള്‍ നടത്തുന്ന സമരം കനത്ത മഴയിലും തുടരുന്നു. വിദ്യാര്‍ഥികള്‍ മനുഷ്യാവകാശ കമ്മിഷന് നല്‍കിയ പരാതിയുടെ അടിസ്ഥാനത്തില്‍ ഇന്ന് കമ്മിഷന്‍ ചര്‍ച്ചയ്ക്ക് വിളിച്ചിട്ടുണ്ട്. രാവിലെ 10.15ന് ഗസ്റ്റ് ഹൗസിലാണ് ചര്‍ച്ച നടക്കുക. ഇതിനിടെ നിരാഹാര സമരത്തിലായിരുന്ന രണ്ടു വിദ്യാര്‍ഥികളെ പൊലിസ് അറസ്റ്റ് ചെയ്തു. ഇന്നലെ ഉച്ചയോടെയാണ് ആദര്‍ശ്, ഷാദില്‍ എന്നീ വിദ്യാര്‍ഥികളെ അറസ്റ്റ് ചെയ്തത്. തുടര്‍ന്ന് ഹര്‍ഷാദ്, ഷാമില്‍ എന്നീ വിദ്യാര്‍ഥികള്‍ നിരാഹാരം തുടങ്ങിയിട്ടുണ്ട്.
23-ഓളം വിദ്യാര്‍ഥികളാണ് ഇവിടെ സമരത്തിലുള്ളത്. തങ്ങളുടെ സര്‍ട്ടിഫിക്കറ്റുകള്‍ തിരികെ നല്‍കണമെന്നും അടച്ച ഫീസും നഷ്ടപരിഹാരവും വേണമെന്നുമാണ് വിദ്യാര്‍ഥികളുടെ ആവശ്യം. എന്നാല്‍ മാനേജ്‌മെന്റ് ഇതിനോട് അനുകൂലമായി പ്രതികരിച്ചിട്ടില്ല. സമരം ശക്തമാക്കാനും എയിംഫിലിന്റെ മറ്റു ബ്രാഞ്ചുകളിലേക്കും സമരം വ്യാപിപ്പിക്കാനും വിദ്യാര്‍ഥികള്‍ ശ്രമം നടത്തുന്നുണ്ട്. അതേസമയം തങ്ങള്‍ക്ക് ചെലവായ സംഖ്യ കഴിച്ച് വിദ്യാര്‍ഥികള്‍ അടച്ച ഫീസ് ഭാഗികമായി തിരിച്ചു നല്‍കാന്‍ മാനേജ്‌മെന്റ് തയാറാകുന്നതായും റിപ്പോര്‍ട്ടുകളുണ്ട്. ബുധനാഴ്ച കലക്ടറുടെ നേതൃത്വത്തില്‍ വീണ്ടും ചര്‍ച്ച നടക്കും.