ഹൈദരാബാദ്: രാജ്യത്ത് ആദ്യം ഒരു പ്രധാനമന്ത്രി അടുത്ത പ്രധാനമന്ത്രിക്ക് ജന്മം നല്‍കുന്ന അവസ്ഥയായിരുന്നുവെന്നും ബി.ജെ.പിയാണ് അത് അവസാനിപ്പിച്ചതെന്നും ഗതാഗത മന്ത്രി നിതിന്‍ ഗഡ്കരി.

പധാനമന്ത്രിയുടെ അടുത്ത തലമുറയും പ്രധാനമന്ത്രിയാകുന്നു, മുഖ്യമന്ത്രിയുടെ മക്കള്‍ മുഖ്യമന്ത്രിയാകുന്നു. ജനാധിപത്യം ഇല്ലാതാകുന്ന അവസ്ഥയിലേക്ക് ഇന്ത്യ നീങ്ങിക്കൊണ്ടിരിക്കുകയായിരുന്നു. ബി.ജെ.പിയാണ് ഇതിന് മാറ്റം വരുത്തിയത് ഗഡ്കരി പറഞ്ഞു.

പാവപ്പെട്ട ജനതയുള്ള സമ്പന്ന രാഷ്ട്രമാണ് ഇന്ത്യ. നേരത്തെ രാജ്യം ഭരിച്ചവര്‍ തങ്ങളുടെ കുടുംബത്തിന് മാത്രം നേട്ടം കിട്ടാനാണ് പ്രവര്‍ത്തിച്ചിരുന്നതെന്ന് ഗഡ്കരി ആരോപിച്ചു. ഹൈദരാബാദില്‍ യുവമോര്‍ച്ച പ്രവര്‍ത്തകരെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.

ബി.ജെ.പി ഒരു കുടുംബ പാര്‍ട്ടിയല്ല. ജാതിയുടെയോ , മതത്തിന്റെയോ ഭാഷയുടേയോ പേരിലുള്ള വേര്‍തിരിവുകള്‍ ബി.ജെ.പിയിലില്ല. വാജ്‌പേയി ആണ് ഞങ്ങളുടെ പരമോന്നത നേതാവ്. നേതൃത്വം ഇടയ്ക്കിടെ മാറുന്നുണ്ടെങ്കിലും ബി.ജെ.പി ഏതെങ്കിലും പ്രത്യേക വ്യക്തിയുടെ താത്പര്യങ്ങള്‍ക്കനുസരിച്ച് പ്രവര്‍ത്തിക്കുന്നില്ല ഗഡ്കരി കൂട്ടിച്ചേര്‍ത്തു.