ന്യൂഡല്‍ഹി:എയര്‍സെല്‍-മാക്‌സിസ് കേസില്‍ മുന്‍ ധനമന്ത്രിപി. ചിദംബരത്തെ കസ്റ്റഡിയിലെടുത്ത് ചോദ്യം ചെയ്യണമെന്ന് എന്‍ഫോഴ്‌സ്‌മെന്റ് ഡയരക്ടറേറ്റ്. ഡല്‍ഹി ഹൈക്കോടതിയില്‍ ചിദംബരത്തിന്റെ മുന്‍കൂര്‍ ജാമ്യാപേക്ഷ പരിഗണിക്കുമ്പോഴായിരുന്നു ഇതിനെ എതിര്‍ത്തുകൊണ്ട് എന്‍ഫോഴ്‌സ്‌മെന്റ് ഡയരക്ടറേറ്റ് അദ്ദേഹത്തെ കസ്റ്റഡിയില്‍ വേണമെന്ന് ആവശ്യപ്പെട്ടത്. അദ്ദേഹം ചോദ്യംചെയ്യലിനോട് സഹകരിക്കുന്നില്ലെന്നും ഇ.ഡി ഹൈക്കോടതിയില്‍ പറഞ്ഞു. കഴിഞ്ഞ മേയിലാണ് മുന്‍കൂര്‍ ജാമ്യം തേടി ചിദംബരം കോടതിയെ സമീപിച്ചത്. പിന്നീട് പലതവണ അദ്ദേഹത്തിന് അനുകൂലമായി വിധിച്ച കോടതി കഴിഞ്ഞ വ്യാഴാഴ്ച കേസ് പരിഗണിക്കവെ നവംബര്‍ ഒന്നുവരെ അദ്ദേഹത്തെ അറസ്റ്റ് ചെയ്യുരുതെന്നും ഉത്തരവിട്ടിരുന്നു. എയര്‍സെല്‍-മാക്‌സിസ് കള്ളപ്പണ ഇടപാടില്‍ ചിദംബരം ഉള്‍പ്പെടെയുള്ള ഒന്‍പതുപേരുടെ പങ്ക് വ്യക്തമാക്കി ഒക്ടോബര്‍ 25ന് എന്‍ഫോഴ്‌സ്‌മെന്റ് ഡയരക്ടറേറ്റ് കോടതിയില്‍ കുറ്റപത്രം സമര്‍പ്പിച്ചിരുന്നു. ചിദംബരത്തിന് പുറമെ അദ്ദേഹത്തിന്റെ മകന്‍ കാര്‍ത്തി ചിദംബരത്തിന്റെ ചാര്‍ട്ടേര്‍ഡ് അക്കൗണ്ടന്റ് എസ്.ഭാസ്‌കരമാന്‍, എയര്‍സെല്‍ മുന്‍ സി.ഇ.ഒ വി. ശ്രീനിവാസന്‍, മാക്‌സിസ് സ്ഥാപനത്തിലെ അഗസ്റ്റസ് റാല്‍ഫ് മാര്‍ഷല്‍, മലേഷ്യയിലെ ആസ്‌ട്രോ ഓള്‍ ഏഷ്യാ നെറ്റ് വര്‍ക്ക്, എയര്‍സെല്‍, മാക്‌സിസ് മൊബൈല്‍ സര്‍വിസ്, ഭൂമി അര്‍മദാ ബെര്‍ഹാദ്, ഭൂമി അര്‍മദാ നാവിഗേഷന്‍ അടക്കമുള്ളവരാണ് പ്രതികള്‍.