താമരശേരി: ചുരത്തിലെ പൊലിസ് ഔട്ട് പോസ്റ്റിലും ലക്കിടിയിലെ പ്രവേശന കവാടത്തിലുമുള്‍പ്പെടെ ചുരത്തിന്റെ വിവിധ ഭാഗങ്ങളില്‍ നിരീക്ഷണ സി.സി.ടി.വി കാമറകള്‍ സ്ഥാപിച്ചു. പദ്ധതിയുടെ ഉദ്ഘാടനം താമരശേരി ഡിവൈ.എസ്.പി പി. ബിജുരാജ് നിര്‍വഹിച്ചു. സ്വകാര്യ സ്ഥാപനങ്ങളുടെയും വ്യക്തികളുടെയും സഹകരണത്തോടെയാണ് ആദ്യഘട്ടത്തില്‍ കാമറകള്‍ സ്ഥാപിച്ചത്.
ചുരത്തില്‍ ഈയിടെയായി വര്‍ധിച്ചു വരുന്ന മാലിന്യപ്രശ്‌നങ്ങള്‍ക്കും സാമൂഹ്യപ്രശ്‌നങ്ങള്‍ക്കും ഇതോടെ പരിഹാരമാകുമെന്നാണു പൊലിസും ചുരം സംരക്ഷണസമിതി പ്രവര്‍ത്തകരും കരുതുന്നത്. വാഹനങ്ങളില്‍ കൊണ്ടുവന്ന് മാലിന്യം കൊക്കയിലേക്ക് തള്ളി കടന്നുകളഞ്ഞ നിരവധി സംഭവങ്ങളുമുണ്ടായിരുന്നു.
അടിവാരത്തുനിന്നും വയനാട്ടില്‍നിന്നും ചുരത്തിലേക്ക് പ്രവേശിക്കുന്ന വാഹനങ്ങള്‍ ഈ കാമറകളില്‍ പതിയും. ഇതുകൂടാതെ ചുരത്തിലെ തന്നെ ഹോട്ടലുകള്‍, റിസോര്‍ട്ടുകള്‍ തുടങ്ങിയവയിലും അധികൃതരുടെ നിര്‍ദേശത്തെ തുടര്‍ന്ന് സി.സി.ടി.വി കാമറകള്‍ സ്ഥാപിച്ചിട്ടുണ്ട്. ചുരത്തില്‍ സോളാര്‍ ലൈറ്റുകള്‍ കൂടി സ്ഥാപിക്കുന്നതോടെ കൂടുതല്‍ സ്ഥലങ്ങളിലേക്കും സി.സി.ടി.വി കാമറകള്‍ വ്യാപിപ്പിക്കും. ഇതിനിടെ രണ്ടാഴ്ച മുന്‍പ് സാമൂഹ്യവിരുദ്ധര്‍ മദ്യപിച്ച് അടിപിടിയുണ്ടാക്കിയതിന്റെ പശ്ചാത്തലത്തില്‍ ചുരത്തിലെ പെട്ടിക്കടകള്‍ രാത്രി പത്തിനു ശേഷം തുറന്നുപ്രവര്‍ത്തിക്കരുതെന്ന നിര്‍ദേശവും പൊലിസ് നല്‍കിയിട്ടുണ്ട്.
ചടങ്ങില്‍ പുതുപ്പാടി പഞ്ചായത്ത് പ്രസിഡന്റ് അംബിക മംഗലത്ത് അധ്യക്ഷയായി. എന്‍.കെ മുഹമ്മദ്, കൊടുവള്ളി ബ്ലോക്ക് പഞ്ചായത്ത് പ്രസിഡന്റ് ഇന്‍ ചാര്‍ജ് സൂപ്പര്‍ അഹമ്മദ്കുട്ടി ഹാജി, ബ്ലോക്ക് പഞ്ചായത്ത് മെംബര്‍ ഒതയോത്ത് അഷ്‌റഫ്, മുത്തു അബ്ദുസ്സലാം, ഷാഫി വളഞ്ഞപാറ, ഹംസ, എന്‍.കെ.സി ബഷീര്‍, സിറാജ് വൈത്തിരി, ചുരം സംരക്ഷണസമിതി പ്രസിഡന്റ് മൊയ്തു മുട്ടായി, സെക്രട്ടറി പി.കെ സുകുമാരന്‍, വി.കെ താജുദ്ദീന്‍, താമരശേരി ട്രാഫിക് എസ്.ഐ രാജു, എ.എസ്.ഐ വിജയന്‍, ഷൗക്കത്ത് എലിക്കാട് സംസാരിച്ചു.