കോഴിക്കോട്: തൃശ്ശൂർ ചേറ്റുവയിൽ നിന്നും കാസർകോട്ടേക്ക് കൊണ്ടുപോവുകയായിരുന്ന മണ്ണുമാന്തി യന്ത്രം (ഡ്രഡ്ജർ) കോഴിക്കോട് തീരത്ത് കടലിൽ മുങ്ങി. കോഴിക്കോട് ലൈറ്റ് ഹൗസ് തീരത്തുനിന്നും ഏകദേശം എട്ട് കിലോമീറ്റർ (നാല് നോട്ടിക്കൽ മൈൽ) അകലെ ശനിയാഴ്ചയായിരുന്നു അപകടം. ഡ്രഡ്ജറിലുണ്ടായിരുന്ന രണ്ട് ജീവനക്കാർ കടലിലേക്ക് ചാടി രക്ഷപ്പെട്ടു.

അപകടം നടന്നത് ഇങ്ങനെ

തൃശ്ശൂർ ചേറ്റുവ സ്വദേശി അരുൺ കുമാറിന്റെ ഉടമസ്ഥതയിലുള്ള 'ഷൺമുഖ സിഎസ്ഡി 4' എന്ന ഡ്രഡ്ജറാണ് അപകടത്തിൽപ്പെട്ടത്. കാസർകോട് കസബ ഫിഷിങ് ഹാർബറിലെ മണൽ നീക്കുന്നതിനായി മറ്റൊരു ബോട്ടിൽ കെട്ടിവലിച്ച് കൊണ്ടുപോകുന്നതിനിടെയാണ് അപകടമുണ്ടായത്.

പെട്ടെന്ന് ഡ്രഡ്ജർ കടലിൽ താഴാൻ തുടങ്ങിയതോടെ, അതിലുണ്ടായിരുന്ന രണ്ട് ജീവനക്കാർ ഉടൻ തന്നെ കടലിലേക്ക് ചാടുകയും തൊട്ടടുത്തുള്ള ബോട്ടിലേക്ക് കയറി രക്ഷപ്പെടുകയുമായിരുന്നു. വലിയൊരു അപകടമാണ് തലനാരിഴയ്ക്ക് ഒഴിവായത്.

തുടർനടപടികൾ

അപകടത്തെക്കുറിച്ച് അറിഞ്ഞയുടൻ കോസ്റ്റ് ഗാർഡ് അസിസ്റ്റന്റ് കമാൻഡന്റിന്റെ നേതൃത്വത്തിൽ സ്ഥലത്തെത്തി പരിശോധന നടത്തി. എന്നാൽ ഡ്രഡ്ജർ മുങ്ങാനുണ്ടായ കൃത്യമായ കാരണം ഇതുവരെ വ്യക്തമായിട്ടില്ല.സംഭവത്തിൽ വിശദമായ അന്വേഷണം നടത്തുന്നതിനായി ഡ്രഡ്ജറിന്റെ ഉടമയെ പോർട്ട് ഓഫീസർ വിളിച്ചുവരുത്തിയിട്ടുണ്ട്. ഉടമയോട് ഡ്രഡ്ജറുമായി ബന്ധപ്പെട്ട രേഖകൾ ഹാജരാക്കാൻ അധികൃതർ നിർദ്ദേശിച്ചു.കടലിലെ മലിനീകരണ സാധ്യതയും ഗതാഗത തടസ്സവും കോസ്റ്റ് ഗാർഡ് വിലയിരുത്തി വരികയാണ്.