മലപ്പുറം: ഡങ്കിപ്പനി ബാധിച്ച് നിരവധി പേര്‍ മരണപ്പെട്ടിട്ടും സര്‍ക്കാറിന്റെ അലംഭാവത്തില്‍ പ്രതിഷേധിച്ച് യൂത്ത് കോണ്‍ഗ്രസ് മലപ്പുറം പാര്‍ലമെന്റ് കമ്മിറ്റിയുടെ നേതൃത്വത്തില്‍ കലക്‌ട്രേറ്റ് പരിസരത്ത് റോഡ്‌സൈഡ് ഐസിയു പ്രതിഷേധ പരിപാടി സംഘടിപ്പിച്ചു. കഴിഞ്ഞ കാലങ്ങളിലൊക്കെ ആരോഗ്യ രംഗത്ത് നിരവധി നിയമങ്ങള്‍ നടത്തിയും ആവശ്യത്തിന് മരുന്ന് നല്‍കിയും സര്‍ക്കാര്‍ പ്രതിരോധ പ്രവര്‍ത്തനങ്ങള്‍ നടത്തിയിരുന്നു.

കാലവര്‍ഷക്കാലത്ത് രോഗികളുടെ എണ്ണം നാലിരട്ടി വര്‍ധിക്കുന്ന സാഹചര്യമാണുള്ളത്. എന്നാല്‍ അത്തരം സാഹചര്യം നേരിടുന്നതില്‍ സര്‍ക്കാര്‍ പരാജയമാണ്. സര്‍ക്കാര്‍ ആശുപത്രികളില്‍ ഡോക്ടര്‍ ഉള്‍പ്പെടെ നിരവധി ഒഴിവുകള്‍ നിലവിലുള്ളത്. കൊതുക് നശീകരണ പ്രവര്‍ത്തനങ്ങള്‍ നിലച്ച മട്ടാണ്. രക്തദാന ക്യാമ്പുകള്‍ സംഘടിപ്പിക്കാനും രോഗങ്ങളെയും രോഗപ്രതിരോധ പ്രവര്‍ത്തനവും സംബന്ധിച്ച ലഘുലേകള്‍ വിതരണം ചെയ്യാനും യൂത്ത് കോണ്‍ഗ്രസ് തീരുമാനിച്ചിട്ടുണ്ട്.
കലക്‌ട്രേറ്റിന് മുന്നില്‍ പ്രതീകാത്മക ഐ.സി.യു തയാറാക്കി മുഴുവന്‍ പ്രവര്‍ത്തകരുടെയും കൈയിലും ഗ്ലൂക്കോസ് ഡ്രിപ്പ് കുത്തിവച്ചുമാണ് പ്രതിഷേധം സംഘടിപ്പിച്ചത്.
പ്രതിഷേധം കെ.പി.സി.സി സെക്രട്ടറി വി എ കരീം ഉദ്ഘാടനം ചെയ്തു. റിയാസ് മുക്കോളി അധ്യക്ഷനായി. ഡി.സി.സി വൈസ് പ്രസിഡന്റ് വീക്ഷണം മുഹമ്മദ്, സി.കെ രതീഷ് കൃഷ്ണ, പി.ആര്‍ രോഹില്‍നാഥ്, ഹസ്സന്‍ പൊന്നോത്ത്, എം.കെ മുഹ്‌സിന്‍, സി.കെ ഹാരിസ്, നാസര്‍ പറപ്പൂര്‍, സജാദ് ബാബു, ജൈസല്‍ എളമരം, ഷിജോ മൂത്തേടം, സി.എ ഫൈറൂസ്, സിയാദ് പോങ്ങാടന്‍, അന്‍വര്‍ അരൂര്‍, ലത്തീഫ് കൂട്ടാലുങ്ങല്‍, ദിനേശ് മണ്ണാര്‍മല സംസാരിച്ചു.