കിഴിശ്ശേരി: കുഴിമണ്ണ പഞ്ചായത്തില്‍ നെല്‍വയലുകള്‍ വ്യാപകമായി മണ്ണിട്ട് നികത്തുന്നു. പഞ്ചായത്തിലെ ചെറുപറമ്പിലെ വയലാണ് മണ്ണിട്ടു നികത്തുന്നത്. കഴിഞ്ഞ ദിവസം രാത്രിയില്‍ ലോഡ് കണക്കിന് മണ്ണ് കൊണ്ടുവന്നാണ് വയലുകള്‍ നികത്തിത്തുടങ്ങിയത്. പുലര്‍ച്ചെയാണ് വയല്‍ നികത്തല്‍ നാട്ടുകാരുടെ ശ്രദ്ധയില്‍പ്പെട്ടത്.
മുന്‍പ് ഇവിടെ മണ്ണ് നികത്താന്‍ നടന്ന ശ്രമം പ്രതിഷേധങ്ങള്‍ കാരണം നിറുത്തിവച്ചിരുന്നു. എന്നാല്‍ ഇപ്പോള്‍ വയല്‍ നികത്തല്‍ വീണ്ടും തുടങ്ങിയിരിക്കുകയാണ്. 45 ഏക്കറോളം നെല്‍പ്പാടങ്ങളാല്‍ ചുറ്റപ്പെട്ട പ്രദേശമാണിത്. ഇതിനെതിരെ പ്രദേശവാസികള്‍ വില്ലേജ് ഓഫിസര്‍ക്ക് ചിത്രങ്ങള്‍ സഹിതം പരാതി നല്‍കി. മുസ്‌ലിം യൂത്ത് ലീഗിന്റേയും എ.വൈ.എഫ്.ഐയുടേയും പരാതിയെ തുടര്‍ന്ന് വില്ലേജ് ഓഫിസര്‍ സ്ഥലം സന്ദര്‍ശിക്കുകയും വേണ്ട നടപടികള്‍ സ്വീകരിക്കുമെന്നും അറിയിച്ചു. പൊലിസ്, റവന്യു അതികൃതരുടെ ഒത്താശയോടെയാണ് വയല്‍ നികത്തല്‍ നടക്കുന്നതെന്ന് നാട്ടുകാര്‍ ആരോപിക്കുന്നു.
പഞ്ചായത്തിലെ വിവിധ പ്രദേശങ്ങളില്‍ വയല്‍ നികത്തല്‍ വ്യാപകമായതോടെ ഇതിനെതിരെ കിഴിശ്ശേരി ടൗണ്‍ മുസ്‌ലിം യൂത്ത് ലീഗ് കമ്മിറ്റി പ്രക്ഷോഭത്തിന് ഒരുങ്ങുകയാണ്.