കോഴിക്കോട്: ടി.പി ചന്ദ്രശേഖരന്‍ വധവുമായി ബന്ധപ്പെട്ട കേസില്‍ എന്റെ വീട്ടില്‍ വക്കാലത്തുമായി സി.പി.എം എം.എല്‍.എ എത്തിയിരുന്നുവെന്നും മന്ത്രി മാണിക്കെതിരേ നിയമസഭയില്‍ അക്രമം നടന്നപ്പോള്‍ സി.പി.എമിനു സ്വകാര്യ അന്യായം ബോധിപ്പിക്കാന്‍ നിയമോപദേശം തേടിയത് എന്നോടായിരുന്നുവെന്നും ബി.ജെ.പി സംസ്ഥാന പ്രസിഡണ്ട് പി.എസ് ശ്രീധരന്‍ പിള്ളയുടെ വെളിപ്പെടുത്തല്‍. അന്നു ബി.ജെ.പിയുടെ നിര്‍ദേശ പ്രകാരം ഞാന്‍ കേസ് ഏറ്റെടുത്തില്ലെന്നും ശ്രീധരന്‍ പിള്ള പറഞ്ഞു. തിരുവനന്തപുരത്ത് പത്രസമ്മേളനത്തില്‍ സംസാരിക്കുകയായിരുന്നു അദ്ദേഹം.

കൊച്ചിന്‍ യൂണിവേഴ്‌സിറ്റിയിലെ എസ്.എഫ്.ഐ നോതാക്കള്‍ക്കെതിരേയുള്ള കേസില്‍ ഹൈക്കോടതയില്‍ ഹാജറായി ജാമ്യം എടുത്തു കൊടുത്തതും ഞാനാണ്. അതിനു പണം പോലു വാങ്ങിയിട്ടില്ല. ജമാഅത്തേ ഇസ്ലാമിയേയും സിറാജ് പത്രത്തേയും ഞാന്‍ സഹായിച്ചിട്ടുണ്ടെന്നും ശ്രീധരന്‍ പിള്ള പറഞ്ഞു.

കോഴിക്കോട്ട് യുവ മോര്‍ച്ചയുടെ യോഗത്തില്‍ നടത്തിയ രഹസ്യ പ്രസംഗം പുറത്തു വന്നതാണ് ശ്രീധരന്‍ പിള്ളയെ പ്രതിരോധത്തിലാക്കിയത്. പത്രപ്രവര്‍ത്തകര്‍ക്കുള്ളില്‍ സി.പി.എമിനായി ഫ്രാക്ഷനുണ്ട്. ഇവരാണ് എനിക്കെതിരേ വാര്‍ത്തകള്‍ പുറത്തു വിടുന്നത്. ചില ചാനലുകള്‍ ചെയ്യുന്നത് മാധ്യമ പ്രവര്‍ത്തനത്തിനു തന്നെ കടുത്ത ദ്രോഹമാണ്. ഒരു ബി.ജെ.പി എം.പിയുടെ ചാനലുണ്ട്. അദ്ദേഹത്തിന്റെ കാര്യം പാര്‍ട്ടി തീരുമാനിക്കട്ടേ എന്നും ശ്രീധരന്‍പിള്ള ഏഷ്യാനെറ്റിനെ സൂചിപ്പിച്ചുകൊണ്ടു പറഞ്ഞു.

നട അടക്കുന്നതുമായി ബന്ധപ്പെട്ടു ശബരിമലയിലെ തന്ത്രി താനുമായി ഫോണില്‍ ബന്ധപ്പെട്ടുവെന്നും തന്റെ നിര്‍ദേശം കിട്ടിയ ശേഷമാണ് നട അടച്ചതെന്നും ശബരിമല ബി.ജെ.പിക്കു ഒരു സുവര്‍ണ അവസരമാണെന്നും ശ്രീധരന്‍പിള്ള പ്രസംഗത്തില്‍ പറഞ്ഞിരുന്നു. എന്നാല്‍ പ്രസംഗം പുറത്തുവന്നതോടെ എല്ലാവരും ചെയ്യുന്നതുപോലെ തന്ത്രിയും നിയമോപദേശം തേടിയതാണെന്നാണ് ശ്രീധരന്‍ പിള്ള പറയുന്നത്. എന്നാല്‍ ശ്രീധരന്‍പിള്ളയുമായി സംസാരിച്ചു എന്ന കാര്യം തന്ത്രി നിഷേധിച്ചു.