കാസര്‍കോട്: അമിതമായി മൊബൈല്‍ ഉപയോഗിക്കുന്നതിന് മാതാവ് വഴക്ക് പറഞ്ഞതിനെ തുടര്‍ന്ന് എലിവിഷം കഴിച്ച പ്ലസ്ടു വിദ്യാര്‍ഥി മരിച്ചു. തമിഴ്‌നാട്ടിലെ മധുര പാറപ്പട്ടി സ്വദേശിയും മംഗളൂരു ബെല്‍ത്തങ്ങടിയിലെ താമസക്കാരുമായ സിങ്കം-സെല്‍വി ദമ്പതികളുടെ മകന്‍ നാഗരാജ്(18)ആണ് മരിച്ചത്.

മൂന്ന് ദിവസം മുന്‍പാണ് നാഗരാജ് വിഷം കഴിച്ചത്. ഉടന്‍ തന്നെ മംഗളൂരുവിലെ സ്വകാര്യ ആശുപത്രിയില്‍ പ്രവേശിപ്പിച്ചു. കഴിഞ്ഞ ദിവസം ആരോഗ്യനിലയില്‍ നേരിയ പുരോഗതി കണ്ടതിനെ തുടര്‍ന്ന് ഡിസ്ചാര്‍ജ് ചെയ്ത് മധുരയിലേക്ക് കൊണ്ടുപോകുന്നതിനിടെ കാസര്‍കോട് എത്തിയപ്പോഴാണ് മരിച്ചത്.

കുടുംബം വര്‍ഷങ്ങളായി കര്‍ണാടക ബെല്‍ത്തങ്ങടിയില്‍ താമസിച്ച് ബേക്കറി നടത്തിവരികയായിരുന്നു. സഹോദരങ്ങള്‍: പ്രഭാകരന്‍, പാണ്ടിദൂരെ, പ്രഭ.