അന്തിക്കാട്: മുറ്റിച്ചൂരില്‍ സാമൂഹ്യ വിരുദ്ധരുടെ അഴിഞ്ഞാട്ടം വ്യാപകമായതോടെ നാട്ടുകാര്‍ ഭീതിയില്‍. കഴിഞ്ഞ ദിവസം രാത്രിയില്‍ ഭക്ഷ്യം സൂപ്പര്‍ മാര്‍ക്കറ്റിനു സമീപം പുതുശ്ശേരി മുഹമ്മദിന്റെ വീട്ടുപറമ്പിലെ വാഴകള്‍ സാമൂഹ്യ ദ്രോഹികള്‍ വെട്ടിനശിപ്പിച്ചു. ഒരാഴ്ച മുന്‍പ് പാലത്തിനു സമീപം പണിക്കവീട്ടില്‍ ഖദീജയുടെ വീടിനു നേരെ ഗുണ്ടാ ആക്രമണം നടന്നു.
വീടിന്റെ ജനല്‍ ചില്ലകള്‍ തല്ലിത്തകര്‍ത്തു. വീടുകളില്‍ പാര്‍ക്ക് ചെയ്യുന്ന ഇരുചക്രവാഹനങ്ങില്‍ നിന്ന് പെട്രോള്‍ ഊറ്റുന്ന സംഘവും പ്രദേശത്ത് വ്യാപകമാണ്.  വീടുകളില്‍ നിന്ന് കരിക്ക്, കോഴി എന്നിവ മോഷണം പോകുന്നുണ്ട്. മുറ്റിച്ചൂര്‍ പാലം കേന്ദ്രീകരിച്ച് രാത്രിയില്‍ കഞ്ചാവ് വില്‍പ്പന നടക്കുന്നതായും നാട്ടുകാര്‍ പറയുന്നു. നാട്ടുകാര്‍ക്ക് ഭീഷണിയായ സാമൂഹ്യ ദ്രോഹികളെ പിടികൂടാന്‍ പ്രദേശത്ത് രാത്രികാല പൊലിസ് പട്രോളിങ് ഏര്‍പ്പെടുത്തണമെന്ന ആവശ്യം ശക്തമായി.