ഗാലെ: ശ്രീലങ്കക്കെതിരായ ഒന്നാം ക്രിക്കറ്റ് ടെസ്റ്റില്‍ ഇംഗ്ലണ്ടിന് 211 റണ്‍സ് ജയം. ടെസ്റ്റിന്റെ തുടക്കം മുതല്‍ തന്നെ ഇംഗ്ലണ്ടിന് മേല്‍ക്കോയ്മയുണ്ടായിരുന്ന മത്സരത്തില്‍ ആധികാരികമായിട്ടായിരുന്നു ടീമിന്റെ ജയം.
13 ടെസ്റ്റ് മത്സരങ്ങള്‍ക്ക് ശേഷമാണ് ഇംഗ്ലണ്ട് എവേ ജയം സ്വന്തമാക്കുന്നത്. ടോസ് ലഭിച്ച ഇംഗ്ലണ്ട് ബാറ്റ് ചെയ്യാന്‍ തീരുമാനിക്കുകയായിരുന്നു. ഒന്നാം ഇന്നിങ്‌സില്‍ 97 ഓവറില്‍ പത്ത് വിക്കറ്റ് നഷ്ടത്തില്‍ ഇംഗ്ലണ്ട് 342 റണ്‍സെടുത്തു. മറുപടി ബാറ്റിങ്ങിനിറങ്ങിയ ശ്രീലങ്കക്ക് പത്ത് വിക്കറ്റ് നഷ്ടത്തില്‍ 203 റണ്‍സെടുക്കാനേ സാധിച്ചുള്ളു. രണ്ടാം ഇന്നിങ്‌സില്‍ ആറു വിക്കറ്റിന് 322 റണ്‍സ് എന്ന നിലയില്‍ ഡിക്ലയര്‍ ചെയ്ത ഇംഗ്ലണ്ട് ഒന്നാം ഇന്നിങ്‌സിലെ ലീഡ് ഉള്‍പ്പെടെ 461 റണ്‍സ് സ്വന്തമാക്കി.
462 റണ്‍സ് വിജയലക്ഷ്യം തേടിയിറങ്ങിയ ലങ്ക 250 റണ്‍സിന് പുറത്താവുകയായിരുന്നു. നാല് വിക്കറ്റ് സ്വന്തമാക്കിയ മൊയീന്‍ അലിയാണ് ലങ്കന്‍ ബാറ്റിങ് നിരയെ തരിപ്പണമാക്കിയത്. ജാക്ക് മൂന്ന് വിക്കറ്റും സ്വന്തമാക്കി. ഒന്നാം ഇന്നിങ്‌സിലും മൊയീന്‍ അലി നാല് വിക്കറ്റ് സ്വന്തമാക്കിയിരുന്നു. ഇംഗ്ലണ്ടിന്റെ മികച്ച ബൗളിങ്ങിന്റെ കരുത്തിലായിരുന്നു ശ്രീലങ്കക്കക്കതിരേ ആധികാരിക ജയം സ്വന്തമാക്കിയത്. മൂന്ന് ടെസ്റ്റുകള്‍ ഉള്‍പ്പെടുന്ന പരമ്പരയിലെ രണ്ടാമത്തെ മത്സരം 14ന് നടക്കും.
ഇന്നലത്തെ മത്സരത്തോടെ ലങ്കയുടെ ഇടംകയ്യന്‍ സ്പിന്നറായ റങ്കണ ഹെറാത്ത് ടെസ്റ്റ് ക്രിക്കറ്റില്‍നിന്ന് വിരമിച്ചു. ജയം കൈയിലാക്കി ക്രിക്കറ്റ് കരിയര്‍ അവസാനിപ്പിക്കാമെന്ന് കരുതിയ 40 കാരനായ ഹെറാത്തിന് തോല്‍വിയോടെ മടങ്ങേണ്ടി വന്നു.