കോഴിക്കോട്: ഇന്ത്യയില്‍ നിന്നുള്ള ആദ്യ സ്വകാര്യ ഹജ്ജ് സംഘം ഇന്ന് പുറപ്പെടും. ഇന്ത്യയില്‍ നിന്നുള്ള ആദ്യ സ്വകാര്യ ഹജ്ജ് സംഘമായ അല്‍ ഹിന്ദിന്റെ സംഘമാണ് ഇന്ന് കൊച്ചി അന്താരാഷ്ട്ര വിമാന ത്താവളത്തില്‍ നിന്നും പരിശുദ്ധ ഹജ്ജ് കര്‍മത്തിനായി മക്കയിലേക്ക് പുറപ്പെടുക.

ആദ്യ സംഘത്തിനുള്ള യാത്രയയപ്പ് ഉദ്ഘാടനം മലപ്പുറം സുന്നി മഹല്‍ ഓഡിറ്റോറിയത്തില്‍ പാണക്കാട് സയ്യിദ് ഹൈദരലി ശിഹാബ് തങ്ങള്‍ നിര്‍വഹിക്കും. പി ഉബൈദുള്ള എം.എല്‍.എ പങ്കെടുക്കും.

നെടുമ്പാശ്ശേരിയിലേക്ക് പ്രത്യേകബസുകള്‍

തിരുവനന്തപുരം: ഹജ്ജ് തീര്‍ഥാടനം സുഗമമാക്കുന്നതിനായി ഈമാസം 21 മുതല്‍ സെപ്റ്റംബര്‍ അഞ്ച് വരെ കോഴിക്കോട്, മലപ്പുറം, തലശ്ശേരി യൂനിറ്റുകളില്‍ നിന്നും കെ.എസ്.ആര്‍.ടി.സി പ്രത്യേക സര്‍വിസുകള്‍ ആരംഭിക്കുമെന്ന് ഗതാഗതമന്ത്രി എ.കെ ശശീന്ദ്രന്‍ പറഞ്ഞു.

കോഴിക്കോട്ടുനിന്നു രാവിലെ 9.30 നും 9.45 നും നെടുമ്പാശ്ശേരി എയര്‍പോര്‍ട്ടിലേക്ക് എ.സി ലോഫ്‌ളോര്‍ സര്‍വിസും മലപ്പുറത്തുനിന്നും രാവിലെ 9.30 നും 11.30 നും കോട്ടക്കല്‍, തൃശൂര്‍ വഴി നെടുമ്പാശേരിയിലേക്കും തലശേരി യൂനിറ്റില്‍ നിന്നും പാനൂര്‍ വഴി കോഴിക്കോട് രാവിലെ എത്തിച്ചേരുന്ന രീതിയില്‍ അഡീഷനല്‍ സര്‍വിസും ആരംഭിക്കും.

രാവിലെ 8.15 ന് കോഴിക്കോട് നിന്നും കാസര്‍കോടേയ്ക്ക് അഡീഷനല്‍ സര്‍വിസും പൊന്നാനിയില്‍ നിന്നും നെടുമ്പാശ്ശേരിയിലേക്ക് സര്‍വിസും ആരംഭിക്കുമെന്നും മന്ത്രി അറിയിച്ചു.