ഓമശേരി: തലയില്‍ തീ കത്തിച്ച് ചായ ഉണ്ടാക്കുക. ഇതിനായി തല വച്ച് കൊടുത്ത കൊച്ചു മിടുക്കന് നല്ല ചൂടോടെ ഒരു ഗ്ലാസ് ചായ!. മറ്റൊരു ധൈര്യവാനായ മിടുക്കന്റെ രണ്ട് ഉള്ളംകൈയിലും വച്ച് തീ കത്തിക്കുക. ആളിപ്പടരുന്ന തീ കട്ടയെടുത്ത് വായിലേക്ക് ഇടുക. ഐസ് കട്ടയിലേക്ക് വെള്ളമൊഴിച്ച് പെട്ടെന്ന് തീ ആളിക്കത്തുക. പുത്തൂര്‍ ഗവ. യു.പി സ്‌കൂളില്‍ ലോക ശാസ്ത്ര ദിനത്തിന് മുന്നോടിയായി സംഘടിപ്പിച്ച സയന്‍സ് മിറാക്കിള്‍ പ്രോഗ്രാം വിദ്യാര്‍ഥികളെ രണ്ടു മണിക്കൂര്‍ നേരം ശരിക്കും അത്ഭുതപ്പെടുത്തി.
ഇവയിലെല്ലാം ഒളിഞ്ഞു കിടക്കുന്ന ശാസ്ത്ര രഹസ്യം പുറത്തായപ്പോള്‍ ശാസ്ത്രത്തിന്റെ അപാര സാധ്യതകളെ കുറിച്ചായിരുന്നു പിന്നീട് ഓരോരുത്തര്‍ക്കും അറിയാനുണ്ടായിരുന്നത്. കരിക്കട്ട മിഠായികള്‍ ആയി മാറിയപ്പോഴും ശൂന്യമായ സ്ലേറ്റിലേക്ക് സ്വാഗതവും നന്ദിയും തെളിഞ്ഞ് വന്നപ്പോഴും അതു കൊണ്ട് തന്നെ വിദ്യാര്‍ഥികള്‍ ഒന്നടങ്കം കൈയടിച്ച് സയന്‍സ് മിറാക്കിളിനെ സ്വീകരിച്ചു.
കണ്ണ് വെറുതെ കാണാനുള്ളതല്ലെന്നും യഥാര്‍ഥ നിരീക്ഷണമാണ് വേണ്ടതെന്നുമുള്ള ബോധ്യപ്പെടുത്തലായി മാറി പരിപാടി. അസ്‌ട്രോ കേരള, ശാസ്ത്രസാഹിത്യ പരിഷത്ത് പ്രവര്‍ത്തകന്‍ യു.പി അബ്ദുല്‍ നാസര്‍ മാസ്റ്റര്‍ പരിപാടിക്ക് നേതൃത്വം നല്‍കി.
കരുവമ്പൊയില്‍ സ്‌കൂളിലെ മുഹമ്മദ് സാബിത്ത് എന്ന വിദ്യാര്‍ഥിയും അദ്ദേഹത്തോടൊപ്പമുണ്ടായിരുന്നു. പ്രധാനാധ്യാപകന്‍ പി.എ ഹുസൈന്‍ അധ്യക്ഷനായി. എ. സുരേഷ് കുമാര്‍ സ്വാഗതവും എന്‍.വി അബ്ദുറഹ്മാന്‍ നന്ദിയും പറഞ്ഞു. അനീസ് മൈക്കിള്‍, കെ. ജയശ്രീ, സഹല്‍ന സിറാജ് നേതൃത്വം നല്‍കി.