ലണ്ടന്‍: ചാംപ്യന്‍സ് ട്രോഫി ഏകദിന ടൂര്‍ണമെന്റിന് പകരം നാലു വര്‍ഷത്തിനിടെ രണ്ടു ടി20 ലോകകപ്പ് നടത്താന്‍ ഐ.സി.സിയുടെ തീരുമാനം. കഴിഞ്ഞ ദിവസം സമാപിച്ച ചാംപ്യന്‍സ് ട്രോഫിക്ക് മികച്ച പ്രതികരണമായിരുന്നു ലഭിച്ചത്. ടി.വിയിലും സോഷ്യല്‍ മീഡിയയിലും ടൂര്‍ണമെന്റിനെ കുറിച്ച് മികച്ച അഭിപ്രായം ലഭിച്ചിരുന്നു.
എന്നാല്‍ ഐ.സി.സി ചീഫ് എക്‌സിക്യൂട്ടീവ് ഡേവ് റിച്ചാര്‍ഡ്‌സണ്‍ ടൂര്‍ണമെന്റ് 2021ല്‍ നടക്കുമെന്ന കാര്യത്തില്‍ ഉറപ്പില്ലെന്ന് വ്യക്തമാക്കി. കഴിഞ്ഞ ദിവസം അടുത്ത ടൂര്‍ണമെന്റില്‍ ഇന്ത്യ ആതിഥേയരാവുമെന്ന് റിപ്പോര്‍ട്ടുണ്ടായിരുന്നു. ഈ വിഷം അടുത്ത ആഴ്ച്ച നടക്കുന്ന വാര്‍ഷിക യോഗത്തില്‍ ചര്‍ച്ച ചെയ്യുമെന്ന് റിച്ചാര്‍ഡ്‌സണ്‍ സൂചിപ്പിച്ചു.
ഓരോ തവണയും കാണികളെ സംതൃപ്തരാക്കുക എന്നത് വലിയ വെല്ലുവിളിയാണ്. വ്യത്യസ്തകളാണ് ഓരോ ടൂര്‍ണമെന്റിനും ആവശ്യം. ടി20 ടൂര്‍ണമെന്റിന് ഇപ്പോള്‍ കാണികള്‍ ഏറെയുണ്ട്. ചാംപ്യന്‍സ് ട്രോഫി ഒഴിവാക്കാന്‍ തീരുമാനിച്ചാല്‍ രണ്ടു വര്‍ഷം കൂടുമ്പോള്‍ ഓരോ ടി20 ലോകകപ്പ് എന്ന ആശയത്തിനാണ് ഐ.സി.സി മുന്‍ഗണന നല്‍കുന്നത്. ഇതിലൂടെ ചാംപ്യന്‍സ് ട്രോഫിയുടെ പേര് ലോക ടി20 എന്നാക്കും.
ടി.വി റേറ്റിങ് എന്നീ കാര്യങ്ങളും ടി20 അനുകൂലമാണ്. കൂടുതല്‍ ടീമിന് ഇതുവഴി അവസരവും ലഭിക്കും. 20 ടീമുകളാണ് ഈ ലോകകപ്പില്‍ മത്സരിക്കാന്‍ സാധ്യതയെന്നും റിച്ചാര്‍ഡ്‌സണ്‍ സൂചിപ്പിച്ചു.