തിരുവനന്തപുരം: പകര്‍ച്ചപനിയുടെ പശ്ചാത്തലത്തില്‍ കലക്ടര്‍ എസ്. വെങ്കടേസപതിയുടെ അധ്യക്ഷതയില്‍ തിരുവനന്തപുരം ജില്ലയിലെ വിവിധ സ്വാകര്യ മെഡിക്കല്‍ കോളജ് പ്രിന്‍സിപ്പല്‍മാരുടെ അടിയന്തര യോഗം കലക്ടറേറ്റില്‍ ചേര്‍ന്നു.
  സ്വകാര്യ മെഡിക്കല്‍ കോളജുകളിലെ ഡോക്ടര്‍മാരും മറ്റ് ജീവനക്കാരും ആരോഗ്യ വകുപ്പ് ഉദ്യോഗസ്ഥരുമായി ചേര്‍ന്ന് പ്രവര്‍ത്തിക്കാന്‍ യോഗത്തില്‍ ധാരണയായി.  
കൃത്യമായ ബോധവല്‍ക്കരണ പ്രവര്‍ത്തനങ്ങളിലും കൊതുക നശീകരണ പ്രവര്‍ത്തനങ്ങളിലും രോഗം വന്നവരുടെ ചികിത്സയിലും മറ്റ് തുടര്‍ പ്രവര്‍ത്തനങ്ങളിലും സ്വകാര്യ മെഡിക്കല്‍ കോളജുകളിലെ ഡോക്ടര്‍മാരും പി.ജി വിദ്യാര്‍ഥികളും വിവിധ വിഭാഗങ്ങളിലെ മറ്റ് ജീവനക്കാരും സജീവമായി പങ്കെടുക്കും.
    രോഗം വരാനുള്ള സാധ്യതകളെപ്പറ്റിയും രോഗം വന്നാലുള്ള ചികിത്സയെപ്പറ്റിയും പൊതുസമൂഹം മനസിലാക്കേണ്ടതുണ്ടെന്ന് ഡോക്ടടര്‍മാര്‍ പറഞ്ഞു.
 സ്വയം ചികിത്സ ഒഴിവാക്കി കൃത്യസമയത്ത് ഡോക്ടര്‍മാരുടെ സേവനം തേടണം.  
ഉറവിടത്തില്‍ തന്നെ കൊതുകിനെ നശിപ്പിക്കേണ്ടതുണ്ടെന്നും മിക്കയിടങ്ങളിലും വീടുകള്‍ക്കുള്ളില്‍ തന്നെയാണ് കൊതുകുകള്‍ വളരുന്നതെന്നും അത്തരത്തിലുള്ള സാഹചര്യങ്ങള്‍ ഒഴിവാക്കേണ്ടതാണെന്നും ഡോക്ടടര്‍മാര്‍ പറഞ്ഞു.
ഡി.എം.ഒ ജോസ്. ജി. ഡിക്രൂസ്, തിരുവനന്തപുരം ഗവ. മെഡിക്കല്‍ കോളജ് പ്രിന്‍സിപ്പല്‍ ഡോക്ടര്‍ തോമസ് മാത്യു, വട്ടപ്പാറ എസ്.യു.റ്റി മെഡിക്കല്‍ കോളജ് പ്രിന്‍സിപ്പല്‍ ഡോ. ജോയ് ഫിലിപ്പ്, ഗോകുലം മെഡിക്കല്‍ കോളജ് പ്രിന്‍സിപ്പല്‍ ഡോ. വി. ഗിരിജ, കാരക്കോണം മെഡിക്കല്‍ കോളജ് പ്രിന്‍സിപ്പല്‍ ഡോ. എം.വി ഇന്ദിര, നഷണല്‍ ഹെല്‍ത്ത് മിഷന്‍ ജില്ലാ പ്രോഗ്രാം മാനേജര്‍ ഡോ. സ്വപ്ന, എ.ഡി.എം ജോണ്‍ വി. സാമുവല്‍ യോഗത്തില്‍ സംബന്ധിച്ചു.