ദോഹ: ഇന്ത്യയിലെ ചില വിമാനത്താവള എക്‌സ്‌ചേഞ്ചുകളില്‍ ഖത്തര്‍ റിയാല്‍ സ്വീകരിക്കുന്നില്ലെന്ന് പരാതി. എന്നാല്‍ റിസര്‍വ് ബാങ്ക് ഔദ്യോഗികമായി ഇങ്ങനെയൊരു ഉത്തരവ് ഇറക്കിയിട്ടില്ലെന്നാണ് ബന്ധപ്പെട്ട കേന്ദ്രങ്ങള്‍ അറിയിക്കുന്നത്.
ഗോവ, ബംഗളൂരു വിമാനത്താവളങ്ങളിലെ എക്‌സ്‌ചേഞ്ചുകളില്‍ നിന്നാണ് പ്രധാനമായും പരാതി ലഭിച്ചിരിക്കുന്നത്. നേരത്തേ മംഗലാപുരം, കൊച്ചി വിമാനത്താവളങ്ങള്‍ വഴി യാത്ര ചെയ്തവരും സമാനമായ പരാതി ഉന്നയിച്ചിരുന്നു.
കോഴിക്കോട് വിമാനത്താവളത്തിലെ ഡ്യൂട്ടി ഫ്രീ ഷോപ്പുകളില്‍ ഖത്തര്‍ റിയാല്‍ സ്വീകരിക്കുന്നില്ലെന്ന് പരാതിയുണ്ടായിരുന്നു. റിസര്‍വ് ബാങ്ക് ഓഫ് ഇന്ത്യ അങ്ങനെയൊരു നിര്‍ദേശം നല്‍കിയിട്ടില്ലെന്നാണ് ഇന്ത്യന്‍ എംബസിയുടെ വിശദീകരണം. നേരത്തേ ഖത്തറിലെ ഇന്ത്യന്‍ എംബസി ഇക്കാര്യം സ്ഥിരീകരിക്കുകയും ചെയ്തിരുന്നു.
ബംഗളൂരു വിമാനത്താവളത്തിലെ സെന്‍ട്രിയം എക്‌സ്‌ചേഞ്ചില്‍ ഗള്‍ഫ് രാജ്യങ്ങള്‍ തമ്മില്‍ തര്‍ക്കമുള്ളത് കാരണം ഖത്തര്‍ റിയാല്‍ സ്വീകരിക്കുന്നതല്ല എന്ന് നോട്ടിസ് പതിച്ചിരുന്നു.
ഈ വിഷയത്തില്‍ കേന്ദ്ര സര്‍ക്കാരില്‍ നിന്ന് കൂടുതല്‍ വ്യക്തത തേടിയതായി ഇന്ത്യന്‍ എംബസി ട്വിറ്ററില്‍ അറിയിച്ചു. ഖത്തര്‍ റിയാലിന്റെ മൂല്യം കുത്തനെ ഇടിഞ്ഞേക്കുമെന്ന ഭയത്തില്‍ എക്‌സ്‌ചേഞ്ചുകളും ഡ്യൂട്ടി ഫ്രീ ഷോപ്പുകളും മറ്റും സ്വയം തന്നെ തീരുമാനമെടുക്കുന്നതായാണ് സൂചന.
എന്നാല്‍, ഖത്തറിന്റെ സാമ്പത്തിക സ്ഥിതി പരിഗണിക്കുമ്പോള്‍ റിയാലിന്റെ മൂല്യം അടുത്ത കാലത്തൊന്നും കാര്യമായി കുറയാന്‍ സാധ്യതയില്ലെന്ന് സാമ്പത്തിക വിദഗ്ധര്‍ പറയുന്നു.