തോമാട്ടുചാല്‍: പൊതുവിദ്യാഭ്യാസ മേഖലയുടെ സംരക്ഷണവും വിദ്യാഭ്യാസ മേഖലയില്‍ നടക്കുന്ന വിവേചനവും പ്രമേയമാക്കി ഹൈസ്‌കൂള്‍ വിഭാഗം നാടക മത്സരത്തില്‍ അവതരിപ്പിച്ച നാടകത്തിന് ഒന്നാം സ്ഥാനം.
കുപ്പാടി ജി.എച്ച്.എസ് സ്‌കൂളാണ് വിദ്യാഭ്യാസ മേഖലയില്‍ നിലനില്‍ക്കുന്ന രാഷ്ട്രീയപരവും സാമുദായപരവുമായ വിവേചനവും തരംതിരിക്കലും നാടകത്തിലൂടെ തുറന്നു കാട്ടുന്നത്. പൊതുയിട സംരക്ഷണം എന്ന ലക്ഷ്യവുമായാണ് നാടകം അരങ്ങിലെത്തിച്ചത്.
പ്രകൃതിയില്‍ സാദാരണമായി കാണുന്ന ജീവികളെയാണ് കഥാപാത്രങ്ങളായി അവതരിപ്പിച്ചിരിക്കുന്നത്. പാമ്പ്, കോഴി, മുള്ളന്‍പന്നി, പൂച്ച തുടങ്ങിയവയാണ് കഥാപാത്രങ്ങളായി അവതരിക്കുന്നത്. തൊടികളുടെ സംരക്ഷണം, സര്‍ക്കാര്‍ സ്ഥാപനങ്ങളുടെ സംരക്ഷണം തുടങ്ങിയവയും നാടകത്തിന് ഇതിവൃത്തമാകുന്നുണ്ട്. മികച്ച നടനുള്ള പുരസ്‌കാരവും ഈ നാടകത്തില്‍ പ്രധാന കഥാപാത്രത്തെ അവതരിപ്പിച്ച അജില്‍ ചാക്കോയ്ക്കാണ് ലഭിച്ചത്.
ഗിരീഷ് കാരാടി ആണ് രചന നിര്‍വഹിച്ചിരിക്കുന്നത്. കേരള സംഗീതനാടക അക്കാദമിയുടെ മികച്ച നടനുള്ള പുരസ്‌കാരം നേടിയ ഗിരീഷ് കാരാടിയാണ് സംവിധാനം. ഉപജില്ലാ മത്സരത്തില്‍ രണ്ടാം സ്ഥാനം നേടിയതിനെ തുടര്‍ന്ന് അപ്പീലിലൂടെയാണ് ജില്ലയില്‍ മത്സരിക്കാന്‍ എത്തിയത്.